أنوارعبدالرحمن
نكن لآبائنا وأمهاتنا كل احترام وتقدير، لكن بعض الحكايا (الحزاوي) لو سمعها طفل من جيل هذا الوقت، لاستغرب من تفاصيلها ولم يصدق أحداثها، وربما لأن الزمن تغير وتغيرت حتى أفكار الناس، وهذا الموضوع لا أقصد فيه شخصية معينة، لكني أشير فيه إلى نوعية بعض «الحزاوي».
-
اشلونچ أم شاهينة؟ من زمان ما شرفتينا في برنامجنا، وقلتي لنا من حزاياتچ الحلوة.
-
شسوي يا بنيتي.. مشغولة وايد، عزايم ومواجيب، وساعات أسافر بس عشان أحضر عرس أو ندوة، والحمد لله عالصحة والعافية.
-
الله يتمم عليچ يا خالتي.
-
هو هو، اشدعوه كبرتيني؟ لا تناديني خالتي، قولي أم شاهينة وبس.
-
أم شاهينة.. مشتاقين حق احزاياتچ، المستمعين ينطرون منچ سالفة حلوة من سوالفچ القديمة، اللي صارت بالكويت أو بالخليج.
-
يستاهلون المستمعين، وأنا بحازيكم اليوم عن مرت النجار، صارت هالقصة بعمان.
-
تفضلي قوليها لنا.
-
كان في نجار فقير، متزوج وعنده سبع اعيال، وكل يوم يروح الغابة ويقطع الخشب ويبيعه بالسوق، ويشتري بالفلوس أكل لعياله المساكين.
-
وبعدين؟
-
وفي يوم من الأيام صار مريض، بس طال معاه المرض، واعياله صاروا يبكون من اليوع، وامهم قالت ماكو حل إلا أني أقوم أخيط وأبيع، ومرة من المرات كانت قاعدة بالسوق تعرض الخامات والهدوم اللي عندها، مر عليها واحد فقير طلب منها فلوس عشان يسد جوعه.
-
وي مسكينة اهي توكل اعيالها وإلا هالريال؟
-
المهم وقامت عطته الفلوس ورجعت واعيالها ينطرون الأكل بس قصت عليهم وسوت نفسها تطبخ لهم لين ناموا يواعه، وقام الريال كل يوم يجيها وهي تعطيه الفلوس عشان كان كاسر خاطرها مدة شهر كامل، ومثل كل مرة اعيالها ينطرون الأكل بس ينامون على جوعهم.
-
شهر كامل؟
-
أي شهر كامل.
-
وبعدين شنو صار؟
-
وفي يوم من الأيام احلمت بواحد عليه بشت أبيض وشايل فانوس كبير وقال لها، مثل ما وكلتي الفقير وسديتي جوعه شهر كامل، اعيالچ ما راح يحتاجون ياكلون بيكبرون وبيصيرون بصحة وعافية محد مثلهم بالبلد، وفعلا قامت الصبح وإلا اعيالها ما فيهم شي يلعبون وينطون أحسن حتى من اللي ياكلون، وقاموا يروحون المدرسة ويدرسون ويطلعون من الأوائل.
-
يا سبحان الله.
-
أي شفتي اشلون كانت الحرمة ذكية واعرفت كيف تتصرف؟
-
أي حدهااا.. وااااايد كانت ذكية.
-
مممم أم شاهينة، بسألچ الحين، هالسالفة أكيد صارت بعمان، وصحيحة؟!
-
إي.. هو.. أمي كانت امحازيتها علي، وصحيحة 100%.
-
انزين، ما قلتي لنا، زوج هالحرمة الذكية اش صار عليه؟
-
زوجها؟؟.. شنو؟ أنا ما قلت لچ مساع انه مات؟
-
لا.. ما قلتي.
-
امبلا مات.. عيل اللي ما ياكل شهر كامل شنو يصير فيه؟
-
هااا؟!
شي ما شفتوه:
مذيعتنا الغالية، أنا مستمع دايم لبرامجچ الشيقة، وأشكرچ على استضافتچ لأم شاهينة، أما سالفة مرت النجار، ودي أصدق ودي.. بس قوية.. حدها قوية.