أنوار عبدالرحمن
الموضة تتغير وتتجدد، ولكن ما يناسب شخصا قد لا يناسب آخر، وإليكم الموقف الذي حدث لحسينة مع زوجها.
- ـ أبيييه مريومة ما قلت لج شنو صار لي أمس مع زوجي لما رد من السفر؟
- ـ شنو؟.. خير؟
- ـ انت عارفه اني امسويه تان، وصابغة شعري أشقر، عشان أغير من شكلي وأفاجئ زوجي.
- ـ إي قلتيلي، بشري شنو كان رأيه؟
- ـ أنا كنت محضرتله مفاجأة في الصالة، لما يدخل البيت، وقلت لليهال يقتون ورد عليه لما يفتح الباب.
- ـ خوش استقبال.
- ـ أي استقبال؟؟؟؟ قولي غربال
- ـ ابيييه ليش يا حافظ؟ انت يا حسينة من اتسوين شي يطيح على راسج.
- ـ أول ما دخل قام يضحك وسلم على اعياله، ويوم شافني اطلعت اعيونه لي بره، كأن شايف الساحرة التي تطير فوق الخيزران.
- ـ هههه من صجج؟
- ـ أول شي ما كان يبي يحرجني، قال لليهال روحوا بكلم أمكم بروحنا، حسبالي بيقولي كلام حلو وانه ولهان علي، بس أول ما قعد قام يسألني أسئلة غريبة.
- ـ مثل شنو؟
- ـ قالي ليش صايرة سمره زيادة عن اللزوم؟.. ومنو اختارلج صبغة شعرج، وبالأخير قالي أنت شفتي يا حسينة روحج بالمنظرة؟.. اهنيه أنا تمنيت الأرض تبلعني اهئ اهئ اهئ ههههه صج طماشة.
- ـ قلتله.. هذا تان.. وقام يضحك وبعدين قلب الضحك نكد، وقال لي المفروض الواحدة تعرف شنو يناسبها وشنو ما يناسبها.. بس سمعتي بالتان رحتي ركضتي سويتيه؟ انتي بروحج سمره وما بقى كريم ما استخدمتيه عشان تصيرين بيضة، تيين وتسودينها زيادة.
- ـ لأ.. لأ.. لأ مستحيل هههه مصاريني تقطعت من الضحك ههههه.
- ـ أنا متنكدة وانتي تضحكين؟ صج ما عندج احساس.
- ـ المهم.. لا تسمع مرزوقة بسالفتج هذي، ترى بتصيرين علج بحلوج البنات بعدين.
- ـ أي.. اشوة انج نبهتيني، لا تلقالها هالحسودة سالفة تتشمت فيها علي، بس تدرين شنو بسوي الحين؟
- ـ شنو يا ام الدواهي.
- ـ بتصل على مرزوقة وأقولها..
- شي ما شفتوه:
- ـ ابييه.. مرزوقة بقولج سالفة صارت لي أمس مع زوجي يوم وصل من السفر.
- ـ شنو؟
- ـ كنت كاشختله وامسويه تان وشعري صابغته أشقر.
- ـ من صجج؟.. انتي ابروحج سمره خلقة، وتسوين تان؟
- ـ وي ما عندج سالفة، ماشفتي زوجي اشلون تفاجأ واستانس يوم شافني، قالي لا تغيرين لونج هذا أبدا أبدا أبدا.
- ـ صج؟!
- ـ وانتي لونج مثل لوني، روحي سوي مثلي، وبتشوفين ردة فعل زوجج، وبتدعين لي بالخير!