المستشار التربوي والمعالج النفسي والاجتماعي، والمصلح الميكانيكي «بو بشير» كما عودكم في زاويته هذه، أن يرد على استفساراتكم ويحل مشاكلكم، وقد خصص اليوم هذا الركن للإجابة عن تساؤلات ومشاكل المعلمين والمعلمات.. وإليكم بعض ما وصلته من إيميلات، من قبل 8 شهور.
الطلاب عندي مغرمون بلعب الكرة داخل الصف وكل ما آخذ منهم الكرة يابوا غيرها.. شسوي معاهم؟
عطوهم آخر كل ربع ساعة من كل حصة.. يطلعون فيها مواهبهم الرياضية.. بس انصحكم تطلعون ابهالفترة من الصف
زوجي مهددني مايبيني أقابل أولياء الأمور (الرياييل) وبعض الطالبات امهاتهن ما يحضرن واضطر أقابل الأبو.. وأخاف يدري ويطلعني من الوظيفة؟
خلي زوجچ هو اللي يقابل أولياء الأمور بدالچ، وماراح يطلعچ من الوظيفة.
الناظرة تفضل بعض المدرسات علينا مع ان احنا نكرف حالنا حالهم؟
اكيد انتن بالصف تفضلن بعض الطالبات على غيرهن مع انهن يدرسن ويشاركن حالهن حال غيرهن.
اشلون أخلي الطلاب يحبون طابور الصباح ويحيون العلم بنشاط وقوة؟
اطلب من فرقة موسيقية يسجلون لك شريط يغنون فيه النشيد الوطني وتحية العلم.
اسمع وايد تعليقات من المدرسين ان دمي ثقيل.. شنو الحل؟
اطلب منهم يشيلونه معاك إذا كان اثقيل وايد.
عندنا موجهة شايفة نفسها كل مايت عندي في الحصة لازم تطلع علي سوالف ما تعجبها؟
إذا بتحضر لچ حصة مره ثانية.. من تدخل الصف انت طلعي.
أنا معلمة أدرس الطالبات مادة الفيزياء، وعندي خوف من انفلوانزا الخنازير، وكلما شفت طالبة تعطس، يصير عندي ارتباك وخوف، شسوي؟
اعتقد ان الطالبات هن اللي خايفين منچ ومن مادتچ ومرتبكين، علينا.
عندي طالب فيه سكر.. كل شوي يروح الحمام.. وآنا ماحب احد يقطع علي الدرس لما أكون مندمج بالشرح؟
قوله ياخذ معاه «قيصرية» ويحطها داخل الصف.
الحارس دايما يخز الأبلات؟
خزوه انتوا قبل لا يخزكن.
عندي طالبة السانها طويل، تراددني واتصيد علي الأخطاء وتخلي الطالبات يضحكن علي؟
صيري خوش أبله عاجلة ومؤدبة، عشان ما اتصيد عليچ شي، وخليها تشرح الدرس بدالچ اهي أحسن.
[email protected]