ـ ألو دكتور بو بشير، إذا تسمح بفضفض لك عن الهم اللي بقلبي، لأني دايما أتابع صفحتك اللي عنوانها «اسألوا بو بشير لعله خير» بالجريدة.
ـ تفضلي حياج.
ـ يا بو بشير أمي توفت من يوم كنت صغيره وتزوج أبوي واحدة جيكره حدها، ويابت ثلاث بنات يأكلون الجنجفة من جكرهم.
ـ عيل أكيد انتي حلوه؟.. كملي سالفتج يا قمر.
ـ سالفتي، إن مرت أبوي تغار من جمالي، خلتني مثل الخدامة في البيت، أطبخ وأغسل وأنظف، ومرة راحت مرت أبوي وبناتها الجياكر لحفلة كبيرة، وفيها شخصيات معروفة بالبلد، وعشان ما تخليني أروح الحفلة، عطتني صينية فيها ملح وسكر مخلوطين مع بعض، وقالت لي مابي أرد البيت إلا وانتي فاصلتهم عن بعض.
ـ لحظة شوي قبل لا تكملين، مو هذي قصة سندريلا؟
ـ لا.. وي هذي قصتي، أصلا قصة سندريلا ما خذينها من قصة حياتي.
ـ أها.. كملي.
ـ لكن ضاق خلقي وتنكدت، جان تطلع لي ساحرة عيوز وساعدتني، وانقذتني.
ـ ساحرة عيوز؟ أعوذ بالله.
ـ لا مو ساحرة.. أقصد بنت جيرانا، المهم اني رحت الحفلة، وشافني واحد من الأغنياء واعجب فيني، ويوم صارت الساعة 12 طلعت من الحفلة، بس طاح الجوتي مني وخذاه ذاك الغني، ولما..
ـ لا تكملين.. أنا أكمل لج، وبعدين قام ذاك الغني يدور عنج عشان يتزوجج.
ـ إي.. أبييه اشدراك؟
ـ بس غريبة مافي ريول بمقاس اريولج، فإما تكون ريولج مثل ريول الفيل، وإلا مثل ريول الدياية.
ـ اممم.. مادري .. المهم يوم درا ذاك الغني وين أسكن، وياب الجوتي وخطبني، بس مرت أبوي اوقفت بطريج حياتي، وأنا وصلت الحين للثلاثين وقاعدة عانس، أطالع الجوتي ويطالعني، وكل خواتي تزوجوا إلا آنا.. اهئ اهئ اهئ.
ـ الله يعينج.
ـ أنا أبي حل، شسوي بنفسي، سويت عمليات تجميل، بس مافي فايده.
ـ مو انتي تقولين انج حلوة؟
ـ هااا؟ إي.. اممم أقصد سويت عمليات تجميل حق ظفري الصغير، المهم يا بو بشير أنا أحس بفراغ قاتل، لازوج ولا اعيال ولا حنان ولا حب اهئ اهئ.
ـ أي هذي مشكلة صج.. لما الواحد بفقد الحب والحنان، حتى لو كان عنده زوج أو زوجة، مثلي آنا.
ـ مثلك أنت؟.. أفا يا بو بشير ما تستاهل.
ـ اتصدقين آنا مدلل زوجتي، ومو مخلي عليها قاصر، فلوس وسفرات، وكل اللي تبي، بس ما تعطيني حنان ولا تحسسني بالحب كلش.
ـ الله يعينك.. هذه مشكلة كبيرة، بس اشلون ما حليتها وانت تحل مشاكل الناس وتفسر أحلامهم؟!
ـ أصلا كل اللي تقرينه آخذه من النت وأنشره، بس أنا منو يحس فيني ويهون علي مشكلتي اهئ اهئ اهئ.
ـ بو بشير خنت حيلي، كسرت خاطري، فضفض أنا أسمعك، ترا قلبي كبير وفيه كيلوات من الحنان والحب يا خلف طوايفي.
شي ما شفتوه:
ـ بو بشير ترا صار لك خمس أيام، وأنت تعيد وتزيد بسالفتك، ما عندك شي ثاني.
ـ امبلا عندي سالفة أمي وأبوي.
ـ وأنا هذي حالتي ما أطيح إلا بالمقرودين اللي مثلك، بدال ما أشتكي لهم يشتكون لي.. تدري اشلون؟ فارج عني ولا تتصل ولا أبي أسمع صوتك.
ـ هدي اعصابج لا تزعلين، أنا كنت أفضفض لج عن مشكلتي مع زوجتي.
ـ وااانا شكو، قاعدة اسمعك كلام حلو، وأنت ما عندك سالفة إلا مرتك مالت عليها قطيعة، خلاص طحت من عيني وكرهتك حدي.
ـ ممم انزين اشرايج، ألبسج ذاك الجوتي، وتتزوجيني؟
ـ هااا .. ممم لا عاد، جذي أحطك بعيني وأحبك حدي.
[email protected]