- اتصدقين جمانه أنا من انتقلت حق إدارتكم وأنا زايد وزني خمسة كيلو، قاعدة أشوف نفسي آكل عالفاضي والمليان، مرة أحط العذر وأقول اني من النوع اللي إذا نفسيته صارت تعبانه، آكل الأخضر واليابس، وساعات أقول من الســــعادة اللي أنا فيها يوم يابوني عندكم ومنفتحة شهيتي.
- اصدقچ.. وانا بعد مو لاقية صرفة حق وزني اللي كلما له ويزيد شهر ورا شهر، تدرين اني من يومـــين قعدت على طاولة بنتي الصغيرة، جان تــــــنكسر هههه.
- هههه، لا هذي مو حالة، انتوا اهنيه اتخلون اللي ما ياكل ياكل غصب طيب، اللي تييب معاها فطاير من الصبح، واللي كل ساع يايبة معاها كبب وسمبوسة والا ملفوف بالزيت وحلويات على بو انها تبي تذوقنا من شغلها، واحنا ما نصدق خبر، ونلف الصحون لف.
- بس أحلى شي لما نطلب دايت بيبسي، بعد ما نقضي على الأكل كله هههه.
- هههه، لا وأزيدچ من الشعر بيت، لما نرجع بعد الدوام وتنحط المجابيس جدامنا، ولازم وقتها طبعا تجاملين زوجچ وتاكلين معاه، وتحسـسينه انچ ما ذقتي شي من الصبح.
- انتي ما شفتيني آنا ورقيه ومزون، يوم حط لنا المدير بوفيه بمناسبة ترقية بعض الموظفين، وقال لنا تفضلوا على البوفيه، كل وحدة منا سوت نفسها امسويه ريجيم، ولما خلص المدير والموظفين، رحنا من وراهم قبل لا ينشال وكلينا أكل مال شهر بساعة.
هههه وبعد نبي نضعف؟ هذا مستحيل.
- أنا عندي اقتراح دام الوضع مو عاجبنا، إن احنا نتفق على أكل معين ومقدار من الأكل، عشان ولا وحدة تطالع الثانية.
- إي ياليت، بس أهم شي، ان مريوم العصله هاللي تاكل أكل الشر وما يبين فيها، وقاعدة تييب لنا أصناف وأشكال من البلعة اللي يسويها لها طباخــــــها كل يوم، ما نبيها توطوط عندنا في المكــــتب، ولا تذوقنا من أطباقها، طول ما احنا انسوي حميه، وإلا ترى بتخرب ريجيمنا.
- صح كلامچ.. عالأقل ننقص لنا جم كيلو، لا ينحاش باجر بو العيال من الدريشة!
يعني اتفقنا؟
- إي اعتمدي.. اتفقنا، خلاص، ننوي وربنا المسوي.
شي ما شفتوه:
- مريوم.. مو احنا قلنا لا تيين عندنا مع أطباقچ بالمكتب؟
- تبون الصچ؟.. اليوم طباخنا امسوي لي حلو عجيب، أبي وحدة منكم تذوقه، ولو هي شاطرة تقولي شنو مكوناته!
- هااا؟!... مممم أفا عليچ.. عطيني آنا أعلمچ شنو مكوناته.
- لا.. لا عطيني آنا، أحسن منها في هالسوالف، إن ما علمتچ حتى اشكثر مقاديره ماكون جمانه.
- وي آسفة حدي.. نسيت، توني استوعب انكم أمس قايلين لي بتسوون ريجيم، سامحوني مابي أخرب حميتكم، بروح حق هنوف أذوقها الطبق.
- جمانه.. جمانه، صبري اشــــــوي لا تروحين، نســــينا انقولچ إن احنا غيرنا راينا، باجر بنبدي الريجيم.
[email protected]