ناصر الخالدي
كثير ناس جوعانة تحلم بالخبز والعيش وشوية فواكه، وعندهم عيد لو كان متوفر لهم نص دجاجة لأن الفقر ذابحهم، ما يبون الجوع، لو يموت وتنتهي هالقصة!
وكثير ناس تعبانة من المرض والضيقة ومن العوز والحاجة تشوف عيونهم تدمع وليت الدمع يتكلم.. خلها على الله ناس تحلم وتتمنى وتزرع آمال بعدها آمال وبالحم تتفنن ويجي زمن من بعد طول انتظار ولا تحصد سوى الصدمة، تحلم بأشياء والله لو قلتها ما يصدقني احد ناس تحلم في بيت ما يطق بابه مدور ايجار وتحلم تعيش فرحة ما تجيها رياح الحزن وتحلم تكون مثل باقي خلق الله لا وظائف شاغرة ولا اسلوب، والضماير ما عاد فيها غير لف ودوران في دنانير في وظائف في اسلوب ولكن هل في ضمير؟ بيع واشتر والله ما تشتري بفلوسك رجاجيل ما تشتري غير الرداية وياكثرهم ما بوجيهم غير الحقد والطمع فاضحهم ولكن وش تقول..
ابتكلم ولو كان ما كان ما هي شجاعة ولكن وصلت انا حدي تعبت اكتم واقول بخير وتتعدل واشوف الواقع صعب ولا ينطاق جراح تتمزق ونفوس تتعب وتتعذب والحياة اشكال وألوان وخلها على الله اخاف ان قلت ما تصدقني..
لو قلت لك بأن ألف اسرة ويمكن اكثر ما عندهم غير الحزن لقمة ياكلونها الصبح والظهر وبالليل وبكل لحظة وحزة واكثر من طفل وطفلة ما يعرفون من الفرح الا اسمه وما يلعبون الا في الطين والرملة، دنياهم تعب وحياتهم مختبصة يمرضون وما يستقبلهم المستشفى والمشكلة بدينارين منحلة ولكن من يسمعك والاوضاع منتكسة ولو قلتلك بأن كثير ناس ودها تعيش وتتزوج ولكن القانون يمنعها لا تستغرب وشلون يتزوجون وهم حتى اثبات ما عندهم ارجوك تكفه لا تحسب الناس مثلك ومثلي والله شفت بحياتي اشياء ولو قلتها تموت من قوة الصدمة وعلشان تصدق وتقتنع باللي اقوله تذكر حكمة قديمة تقول «اللي يده في النار مو مثل اللي يده في الماي» مأساة لو شفت سارة وهي تبكي من المرض وعمر ينادي متى نروح للبيت يمه وخالد وده يشتري بلي ستيشن ولكن لو شراها بيصير خفس بالميزانية والحلم يكبر ويكبر، مرة يقولون بنسافر الحفر ومرة الرياض ومرة يقولون ومرة يقولون اوروبا اسكتلندا مرورا بچنيف ومن بعدها فرنسا ولكنهم مساكين مجرد احلام لان الجواز اصعب مما تتصور اجراءات واوراق ومواعيد ما تخلص ومن بعدها يطلع ولكنه بعد مثل صاحبه مسكين ما تستقبله عدة سفارات، يسافر صاحبه ان سافر ويرجع من السفر خاطره مكسور ومشكلة لا صار حلمك في زمن ما به رجال تقدر احلام الرجاجيل ومشكلة اكبر اذا كان حزنك ما يهم اللي حوالينك تزعل وتضايق وينجرح خاطرك ومحد درابك وتأخذ قرضين واحد من البنك وواحد من الحكومة قرض البنك متعب وقرض الحكومة اذلال ومشكلة ما تنحل.
ابتكلم وعندي طلب واحد نداء وندائي لأهل الخير ولكل انسان يحمل بداخله نخوة تكفه لا تخلي دمعة عجوز تطيح چدامك وتكفه لا تكسر بخاطر الشايب وارحم اطفال مالهم من بعد الله عايل والناس للناس والكل بالله وما يموت من الجوع مخلوق.