ناصر الخالدي
خواطرنا من الحزن مكسورة وهمومنا بصدورنا منثورة، أبد ما نعرف سوى الآه والونة، تجينا أيام فيها الموت نتمنى، كبرنا وكنا نقول الصبح تجي أمي وتحضنا ويموت الليل ونوقف على باب الفجر نتحرى وصول الوالد اللي تركنا وفي أذهاننا فكرة أبدا ما تتغير وتتحول وهي مهما طال الوقت فلا بدّ من السفر ترجع أمنا بكينا، صرخنا ترجينا طلبنا ولا غير الخيبة لقينا تجي باكر تجي اليوم أو بعده.
أيتام نصرخ من الوحشة وأيام من شوقنا نصرخ ونتوجع فراغ بداخل قلوبنا وأنهار تجري في عيوننا تدفقها حزن وجريها شجون وإذا كان الأمل صورة فبروازها حنا سهرنا تعبنا وياليت الناس ترحمنا تجوع أجسادنا وأرواحنا جوعها فوق ما تتصور ترن أجراسنا خيال الرأفة يصافحنا يلملم حزننا طيب وترحم حالنا انسانة ونكسر خاطر التاجر ويتصدق علينا دنانير معدودة نصرفها وتكرر النكسة ومن يجهل اليتم معذور لو أتعبنا لأنه ما عرف ظلم الليالي ولا جرب تعبنا معذور لو اتهمنا ولو قسا معذور والله يرحم اللي رحمنا عطانا الأمن وكل الخير وهبنا مرحوم يا راعي الطيب واسمح إذا قصرنا حضنت جراحنا وصرت الأب عسى مثواك للجنة.
يبه عشنا الحرمان من بعدك وأصناف الشقاء جربنا ومن كأس المر تجرعنا على الأشواك نمشي ونتجرح عبير الورد نشمه في زوايا البيت يفوح العطر يحرك مشاعرنا ونفتح الباب متى ترجع لنا تخليت وإلا؟ ارجوك يبه وضح لنا يقولون ما همتك دمعاتي ولا حزني ولا صرختي وشجوني ولا أثر فيك ضعفي ولا فكرت في مستقبلي بدون اسباب تجاهلتني تهربت من واقعك وضحيت فيني لذتك بديت وصرت آخر اهتماماتك ورغم كل اللي سويته أنا لليوم أدافع عنك وتشهد لي بطولاتي أقول بيرجع ويحضني وأنت أبعد الناس عني غضب في داخلي يجري وبركان فيني يتفجر ابسألك جاوبني من طيشك يا يبه شستفدنا؟
يمه أنادي وصوتي يترجم اشتياقي تعبت ابرر هالهروب وأكتب وفائي ولكن زادت جراحي اشوف الأطفال لهم أحلام وكل واحد منهم تحبه حيل أمه يجي للمدرسة يضحك معاه الكشكول والمسطرة وشنطة جديدة ويسولف لي عن أمه ويقول امس رحنا واليوم بنروح وأمي قالت وسوت وأنا مقهور اسمع واتأمل ويفاجئني يقول أنت وين أمك؟ تطيح الدمعة ويفضحني ذهولي وأكرر أمي أمي ومرة أقول أمي مسافرة ومرة أقول الله يرحمها أمي أنا ماتت ولا أدري سوى إني سمعتهم يقولون مسكين خلته أمه. سامح الله الطيش يا يمه وشلون تركتيني فاحشة والفاحشة عار ولؤم لا يحتمل لا ترجعين يا يمه لأن الرجوع اليوم صار أكبر نكساتي عرفت الحقيقة وكل شيء صار واضح وعندي موتكم أرحم من الرجعة ابي ارتاح ابتجاهل أفكاري ابيها تموت بداخلي ولا تكبر مع أيامي.