صالح الشايجي
«صباح الخير يا كويت».
صباح النور، «تريقت»؟!
لا والله، توني متعشي!
عندك ديوانية مخالفة؟!
أنا أسكن في ملحق مؤجر، وتسأليني عندي ديوانية مخالفة؟!
هَوْ! يا حافظ! كم عمرك؟!
سبعين سنة!
وليش ما عندك بيت للحين؟!
مقدم طلب لما كان عمري ثلاثين سنة، وواعدوني بعد عشر سنين إن شاء الله يطلع لي بيت!
وهل أنت متفائل؟!
طبعا، حكومتنا ما تكذب، عشان چذي أنا متفائل!
عندك أولاد؟!
للحين ما تزوجت!
خاطب؟!
للحين ما خطبت؟!
حاط عينك على وحدة؟!
حاطها بس طاحت!
عينك والاّ الواحدة؟!
عيني!
عيل كم عين عندك الحين؟!
ولا عين!
ليش؟!
لأني حطيت عيني الأولى على الحكومة، وهَمْ طاحت، لأن الحكومة ما عطتني وجه!
إذا ما عندك عيون، شلون تمشّي أمورك؟!
اعتمد على حاسة الشم!
إشلون؟!
أشمشم الأخبار!
وشنهو آخر خبر شميته؟
آخر خبر شميته، إنهم بيعطوني بيت بعد عشر سنين في مقبرة الصليبخات!