يا ليت من هو خذاله يالربع سجه
يريح النفس عن ما كان مزعجها
يا خذله أيام لا هذره ولا لجه
ابعيد عن هذرة كثرت لجالجها
ما عاد فيها نعرف الكذب من صجه
تغيرت بعض ناس عن مناهجها
تسبب المشكلة ثم تعمل الضجه
حسب الأوامر من المنتج ومخرجها
تعودت ما تصيد إلا مع العجه
من غير أزمات ما تنجح برامجها
الكل منهم يبيها تكبر الدجه
ثم على الأرض للآخر يدحرجها
كل يفتش عن الأسباب والحجه
يبي المبرر على السلطات يحرجها
لو كان هذا يسبب بالبلد رجه
ما همهم ما يصير وكيف مخرجها
إلى كسب منفعة مالناس محتجه
صار الوطن خلفة من فاز يلهجها
صلى المصلي بلا عمره ولا حجه
والناس في همها والوقت يسهجها
يا عزتي للمواطن وين ما وجه
وصل بعضهم الى القمة وتوجها
وصاروا سبايب أمور كثير معوجه
ما عدلوها وزادوا في معاوجها
والثوب بيدنهم ما ينرفي فجه
صعب على ناسجه يعيد ينسجها
يا الله نج الوطن من شرهم نجه
كثرت علينا الفتن واللي يروجها
ما يبرد القلب لا مايه ولا ثلجه
إلا قـرار الحكيــم اللــي يعالجها