شاللي صاير؟
لاني فوق الأرض أمشي..
ولاني. .طاير
أنا مدري شاللي صاير
أنا كني.. يوم عادي
فجأة جاه العيد.. وحول..
صمته الداكن.. أغاني
ونبضه الساكن.. أماني
وامتلى قلب الثواني
بالحمام
وبالبشاير
ولا أدري.. شاللي صاير
جيتي في موكب لغه
وارفه.. خضرا.. غنيه..
وأنا قلبي..
كان بور
داهمتني حروفك العذبة الشهية
بسرب نور
صار عمري
ممتلي.. شعر وشعور
من هذاك اليوم وقتي
أدمن السكر
وتجنيح العطور
من هذاك اليوم. .أقرا..
كل يوم شيقول برجي
من هذاك اليوم.. أفتح..
للوله.. كل الستاير
ولا أدري.. شاللي صاير
انتي صرتيلي خطاوي
أتبعك.. كلي فرح
مثل درويش المدينة
ما سألتك
ما عرفتك
ما تبينت الملامح
أمشي مدري وين رايح
مدري بستوطن حنينك
ولا بس.. بمر زاير
أنا مدري.. شاللي صاير
أسألك تكفين قولي
شاللي بس وياي.. صاير؟
مسفر الدوسري