جمعــان العــازمـي، شـاعــر مخضـرم يصــافحنا هنا بهـــذا النـص الشعــري الرائع المحبـــوك بإتـقـــان، لا يجيده الا جمعان العازمي، نص يستـحق القـراءة، تابعوه.
الفزعه اللي تنتظرها العين فقلوب الرجال
عيت تساعدني وعيا يتضح مضمونها
لو ان هقواتي ضعيفة ما تسلقت الجبال
أرقا شوامخها واعديها ولا أرضا دونها
ما أخفيت حزني لكن إني ما أظهره في كل حال
إلا على اللي يعرف أوضاعي ويفهم شؤونها
ما شحت أمواج الأماني دون طلعات المحال
الموج عاتي والحبال من الظفر يرمونها
ما قلت يا حبل الرجا وينك وأنا أنتظرك تعال
أجيك في قو وعزيمة ما برد غليونها
ترى الحقيقة عند بعض الناس ضرب من الخيال
يجهل دوافعها وينكرها ويخفي لونها
أدور الفرصة وأعاينها ليا جالي مجال
اللي عليها النفس فاضت شوقها وشجونها
ما عاد فيها حل يا غصن الندى جتك النبال
الناس تقطف حسب رغبتها جميل أغصونها
ما هنت لكن خابت الهقوه ولا به وسع بال
ضاقت عليك إمن المساعي وسطها وركونها
أبحرت في بحر ألوفا وأغرقك طيشك والدلال
ما عاد تقدرها ولا تبكي عليك أعيونها
ان ما تعبت لغايتك ما نلت من صعب المنال
بعض الأمور اصعاب لكن بالعمل يا هونها
اللي طموحه ما يورده القراح من الزلال
يندم على الفرصة وينعاها ويقصر دونها
العز ما ياتي سوا من فعل وإلا راس مال
هذي قناعاتي وهذي فكرتي مضمونها
جمعان مجبل العازمي