يا كويت يا عشقي وأول غرامي
يا ديرة ما مثلها أي ديره
اسمك قسم يلغي جميع الأسامي
فعايلك بعيون شعبك كثيره
يا أم الرجال الطيبين الحشامي
يا فاتنه فيك الصفات المثيره
من عادني طفل ألاعب إبهامي
بصمتلك بصمة رضيع صغيره
وبديت أنا أكبر وأتهجا كلامي
وانتي على شفاي الصغيره كبيره
وكبرت وانتي بالغلا في تنامي
كن الخفوق كتاب والحب سيره
عليك نافس نبض دمي عظامي
وبين العقل والقلب مليون غيره
كل يدين الآخر إنه حرامي
عشانه أصبح في غلاتك خشيره
فيني توهج جمر الأشواق حامي
وأعذب مشاعر بالضماير سعيره
كن النهار اسبوع والشهر عامي
فرقاك شر وشوفتك ألف خيره
يا شمسي اللي ينجلي بك ظلامي
عمري صباحك كل يوم ينيره
يوم السما لك حب قلب وتسامي
فوق العلوم الطايله والقصيره
يا شيخة شيختها بإنسجامي
يا أميرة ما تشبهك أي أميره
كذا بدا يوصفك صادق إلهامي
يوم المشاعر دايره مستديره
يا موطني والوقت لاصار حامي
نجي على شانك سيوف شطيره
يا أغلى بلد قدرك عن العيب سامي
ما تلحقه حقد النفوس الحقيره
صيتك وصل بالمجد غرب وشامي
تشهد لك كفوف الديار الفقيره
كرمك ربي بالشيوخ الكرامي
أهل الوفا والمكرمه والبريره
إخوان مريم في نهار الزحامي
مثل الوجيه النيره والسفيره
حكم جمع ما بين حسم ونظامي
بأمجاد أبو ناصر عسى الله يجيره
صباح أبونا عالي بالمقامي
من حكمته كم دولة تستشيره
شيخ لشعبه مثل غيث الوسامي
أرض الوطن تزهر بفعله وخيره
هذا كلامي.. والولاء في ختامي
يوم المشاعر دايره مستديره
خالد المحسن