مدير المحاسبة: ها بوفلان. أشوفك تتبسم بعد المكالمة؟
المدير العام: اي والله رئيس الشركة وقع على قرار مكافآتنا مالت العمل وقت كورونا.
مدير المحاسبة: شنو! ضحكتني.. وانت شكو بكورونا.. لا انت طبيب ولا انت من الصفوف الأولى.. أنا معاك كنا نشتغل في البيت!
المدير العام: لا تحاتي.. حطيت اسمك معانا.. شوف الكشف، امسك.
مدير المحاسبة: الكشف بس فيه موظفي مكاتبنا.. وين الموظفين اللي اشتغلوا في الميدان وقت الحظر؟!
المدير العام: دزيت لهم شكر بقروب الواتساب.. وبنسوي لهم كتب شكر، اشفيك يا اخوي هذا جزء من شغلهم!
مدير المحاسبة: انت تدري ان الشركة خسرانة، وإجمالي مبلغ المكافآت أعلى من قيمة خسارة الشركة بوقت كورونا! هذي فلوس مساهمين يا بوفلان.. ما يجوز، لو حاطين المبلغ باستثمار أو توزيع للمساهمين أبرك؟ أو مكتفين بميداليات لهم.
المدير العام: مو شغلك.
مدير المحاسبة: انزين وصلني قرار إزالة المزرعة مالت الشركة.. ممكن أعرف ليش، ترى محصولها جيد، ومفيد للشركة!
المدير العام: اي بس مكلفة يبيلها مصاريف وشغل، بعدين فنشت مدير المزرعة تخيل ناسي هوز الماي يشتغل ساعتين!
مدير المحاسبة: وشنو بتحط مكانها؟
المدير العام: مدينة ألعاب.
مدير المحاسبة: بس هذي تكلفتها عالية وعندنا أولويات أخرى.. واشمعنى تسويها بهالمكان، أراضي الشركة الفضاء وايد.. ليش الخساير؟!، مو كافي تكلفة الكمامات اللي شريناها بكمية تكفي لمدة 15 سنة.. لكن صلاحيتها تنتهي بعد سنتين..؟! ولا نسيت ميزانية العلاج في الخارج لموظفي الشركة، لو تجمع ميزانيتها فقط من 10 سنوات كان ممكن نسوي فيها مدينة صحية، ومستشفى على مستوى عالمي بكل محافظة.. بل بكل منطقة.. حرام الهدر بالمال يا بوفلان! لا تعصب، أنا فقط أنصحك لمصلحة الشركة ولمصلحتك، ورئيس الشركة إذا يدري أو ما يدري، بس أكيد مو دايم لك.
المدير العام: تصدق انت مو مال أحط اسمك في كشف المكافآت.. بتسكت ولا أحط اسمك بكتاب تفنيش مدير المزرعة اللي نسى هوز الماي شغال ساعتين؟!
[email protected]