خديجة حمودة و«أ.ش.أ»
افتتح الرئيس عبدالفتاح السيسي امس عددا من المشروعات القومية شملت 1300 صوبة زراعية على مساحة 10 آلاف فدان ضمن المرحلة الثانية من قطاع محمد نجيب للزراعات المحمية، بالإضافة إلى مصنع للتعبئة والتغليف للمنتجات التي يتم إنتاجها من المشروع ومجمع لإنتاج البذور.
وأكد الرئيس السيسى ان المشروعات التي يتم تنفذها تأتي في إطار بناء قدرة الدولة، مشيرا الى ان مشروع الـ 100 ألف فدان صوب زراعية يكفي 20 مليون إنسان، لافتا إلى تحديات النمو السكاني التي نواجهها.
وأشار الى ان «السوق المصري سوق كبير فيه 100 مليون ونحتاج الكل يكون موجود ولا بد أن نعمل مع الكل وفي الريف وكبار التجار والمزارعين».
وأضاف: «لا بد أن نعمل ضبط لآليات السوق بزيادة المعروض ونحتاج إلى أن ننسق من خلال وزارة الزراعة والغرف التجارية والغرف المختلفة المتخصصة في هذا الموضوع لكي يبقي مسارنا وحركتنا متوازنة».
وشدد الرئيس السيسي على ضرورة محاربة الفساد، في معرض حواره مع اللواء محمد عبدالحي رئيس الشركة الوطنية للزراعات المحمية، قائلا: «اللي هياخد جنيه واحد (بطرق ملتوية) مالوش مكان بينا».
وسأل السيسي رئيس الشركة الوطنية عن راتبه الشهري، مشيرا إلى أنه يقطع مسافة كبيرة يوميا للوصول إلى مقر عمله، وقال: «(محمد) لو غمض شعرة من جفن عينيه في مشروع زي كده يعمله كل يوم 10 أو 12 مليون جنيه، و(محمد) راتبه (..)، وساكن في حتة بعيدة، ومشواره من البيت للشغل 80 كيلو رايح جاي».
وتابع: «حد يقول لي: طب ما تسيب له مليون (جنيه)، ولا اديله فيلا يقعد فيها، بقول الكلام ده تاني، وإوعوا تكونوا فاكرين إني بقول إن حد ياخد ويحط في جيبه، لا والله، اللي ياخد جنيه واحد مالوش مكان بينا».
قال الرئيس السيسي: «كلام إن البلد دي أراضيها تتاخد كده، والله المفروض ما في محافظ يسيب متر أرض لأحد، لا أحد يتصور انني ضد حد.. لا والله أنا ضد الفوضى وضد الإهمال وضد اللادولة، لكن أنا والله ما ضد حد خالص، كل الناس في مصر أهلي وحبايبي واخواتي، والله انا بقولكم اسمعوها مني».
وأضاف: «الناس بتعمل في الدولة اللي هي عايزاه وده لا يليق بنا.. انت تاخد ليه حاجة مش بتاعتك، وأنا أسيبك تاخدها ليه.. أمال احنا قاعدين نعمل ايه كلنا، مش انا بس يا جماعة، احنا كلنا مع بعض، احنا قاعدين نعمل ايه، فارجو موضوع كينج مريوط ده، وما أعرفش يا إيهاب انتوا هتنزلوا الكراكات بتاعتكم امتى».
وتابع الرئيس السيسي قائلا: «طيب أنا ها أقول حاجة، أنا شفت بالطيارة وأنا جاي كدة مزارع سمكية هناك، حد يقولي حجم المزارع قد أيه والعائد منها قد ايه وانتو خدتوا فلوسكم ولا ما أخدتوش، طيب أنا بقولكم بالمطلق كده يا مصريين اللي بتسمعوني، كل المزارع السمكية مش عايز أقول النسبة الغالبة منها، اللي توافق عليها من جانب الدولة ما بتدفعش ليه مش عارف، لا أنا عارف، لان الدولة مش موجودة، انت اديتك الكلام ده، وانت وافقت على تعاقد معايا بقيمة في منتهى التواضع اللي في الدنيا وبالتالي ليك وضع صحيح، بس انت ما بتدفعش المقابل بتاعها طيب ليه، طيب والناس القائمين على هذا الأمر ساكتين ليه، طيب أنا عرفت الكلام ده منين، عرفته من المنزلة، لما دخلت في بحيرة المنزلة علشان نضبط الدنيا هناك، يا إيهاب هتنزلوا امتى في كينج مريوط بالكراكات لإن احنا مش هنعمل مزارع سمك في البحيرات، مش هنعمل الكلام ده، احنا بنعمل مية نظيفة جدا ونشيل كل العوائق وترجع المياه دي زي 200 سنة فاتوا، وال انا أقوله لكم ده بتكاليف هائلة احنا بندفعها من صحة ولادنا من المنتجات ال بتطلع دية، بندفعها من هدر القدرات الموجودة وهدر خلي بالكم من التعبير ال هقولهولكم ده... حالة الالتزام والانضباط للدولة تبقى دولة رخوة ما فيش سيطرة أي حد عايز يعمل أي حاجة يعملها.. أقول تعبير تاني... أي حد عايز ياخد حاجة ياخدها، ولا احنا قاعدين نعمل ايه، والله العظيم أنا ما أسيب لابني جنيه ابني مش أي حد تاني، ولا نفسي حتى أصل هاخد ده حرام، انت مش واخد بالك، ده مش معناه ان انا راجل نزيه يعني وشريف لا لا، معناه ان أنا راجل عارف كويس قوي ان احنا ال بناخده ده حرام، وتروح تحج وتعمل عمرة وانت بتاخد مال مش بتاعك».
وأضاف: «أوجه كلامي هذا للمصريين، يجب أن تعلموا جيدا أنه لا يستطيع أحد أن يأخذ أموالا ويضعها في جيبه، لا والله، بداية من شخصي أنا لغاية أي حد، لا يمكننا أخذ جنيه واحد، ومن يعمل ذلك لا مكان له بيننا.. أنا أردت أن أوضح للجميع أن هؤلاء الأشخاص ليسوا كآخرين يمكنهم أن يعملوا في أماكن أخرى بمرتبات تتراوح ما بين 100 ألف إلى 200 ألف جنيه»، مشددا على أن الحد الأقصى لا يتماشى مع إقامة هذه المشروعات الضخمة.
وتابع: «إن ما نسعى إليه ليس الأموال وإنما عز مصر، المقابل الذي نحصل عليه جميعنا هو عز وشرف مصر وكرامتها وكبريائها بين الدول لتكون في مكانها الحقيقي»، مشيرا إلى أن شهيد الجيش والشرطة لم يأخذ معه إلا الكرامة، خاصة أنه ترك أولاده وزوجته وراءه.
وطالب الرئيس السيسي بضرورة التنسيق مع القطاعات الأخرى لكي يحصل التناغم بين جميع الأطراف، موجها الشكر لكل القائمين على المشروع.
وأضاف: «إننا نفتتح مثل هذه المشروعات في العلن لنبين للجميع الإنجازات التي تتحقق، ونوضح للجميع أن من يتآمر لأجل الهدم والتدمير يكون في الخفاء، أقول لكل من يسمعني أنه لا يمكن أبدا أن تتقدم بلاد للأمام من خلال التدمير، لأن ذلك أمر ضد السنن التي خلقها الله سبحانه وتعالي، إن البلاد تتقدم بالبناء والتعمير والتآخي وليس بالقتل والتخريب والتدمير».
واشار السيسي بالقول: «الفكرة كلها مبنية على استنزاف قدرات الدول في صراع لا ينتهى»، متسائلا: لصالح من يعمل للصراع وهو لن ينجح؟.. ليس لكونه ضعيفا بل لغياب الأساس الفكري والإنساني والأخلاقي لديه.. قائلا: إننا نحتفل اليوم لأننا لا نتآمر ولا نرغب في التخريب أو التدمير كل ما نريده هو البناء وأن يعيش المواطنون معا حياة أفضل.