أحمد السقا: الشعب يريد أخلاق المسجد والكنيسة

مش هاقول الشعب يريد أخلاق الميدان، هنقول كلنا، الشعب يريد اخلاق المسجد، الشعب يريد اخلاق الكنيسة، بهذه الكلمات سجل الفنان احمد السقا آراءه على مدونة «ناس» وتابع قائلا: لو اتعاملنا مع بعض زي ما بنتعامل مع اول ما بندخل المسجد انك لما بتشوف حد كبير على باب المسجد بتقوله اتفضل انت الاول ولما يكون واحد واقف في الصف غلط تتعامل معاه بكل ذوق وهدوء وتوقفه في مكانه صح ولما يكون فيه حد كبير بينصحك لانك فيه حاجة كانت نقصاك في الوضوء وبتسمعه وترد عليه بكل احترام، يا ريت دي تبقى اخلاقنا في الحياة خارج المسجد وكذلك خارج الكنيسة، يا ريت ننشرها في حملتنا ابدأ بنفسك. لو نفسك المصريين يكونوا ايجابيين، ابدأ بنفسك، لو شايف اننا لازم نركز في بناء البلاد، ابدأ بنفس، لو شايف ان المصريين لازم يغيروا كتير من سلوكياتهم، ابدأ بنفسك، لو شايف اننا لازم نحترم اشارات المرور، اننا لازم نحافظ على نظافة الشوارع، انه لازم المصريين يشتغلوا باجتهاد ابدأ بنفسك، كن انت التغيير الذي تريد ان تراه.