بقلم: نهى حمدي
يا سيادة الرئيس.. مش كفاية إنك زعيم.. إنك أمين.. إنك بتحلم بالبلد دي تستقيم.. طول ما اللي تحتك مش عدل مش هتتعدل ولا تستقيم.. طول ما الوزير معدوم الضمير.. وشلته في خيرها طمعانين.. مش هستقيم.. وإن حصل وجه وزير أمين.. ويخاف من مقابلة رب كريم.. بيلاقي ألف جحر وجحر في وزارته.. من نائب لوكيل لمدير لمسؤول شؤون موظفين.. ويقف حيران وتايه يا ترى يسد مين ولا مين! وطبعا بيسد بقه ويستكين.. ولّا يستقيييل!؟
****
قبل ما تحفر للقناة شيل اللي خيرها حينهبوه..
فاكر يا ريس لما كانوا بيحفروا الشارع ويرجعوا يرصفوه؟.. ويرجعوا يحفروا مهو الـ!!!
نسيوا يركبوه.. وهلم جرا.. ويولع إللي في حفره شقيانين وإللي بيمشوا عليه قرفانين «المهم» هما شبعانين.
فاكر يا ريس طباخ الرئيس؟.. حاول رئيسه بكل جهده يوصل له لكن مفيش..
المشكلة في الوسيط يا ريس.. لازم يكون شريف..
أوعى تنسى إن إللي قبلك برضه كانوا كويسين..
وضيعتهم ثقتهم في إللي في الخير طمعانين..
املنا فيك كبير تنضفها من الفسدانين.. ونشوفها بعيوننا بتضحك فرحانة واحنا مرتاحين.. ونبني فيها بإيدينا الشقيانين..
ودلوقتي بنقول أملنا.. مش عايزين نقول «كاان» أملنا.. وخلي بالك الفرق بينهم كبير..
عارفين إنك طموح وإن نفسك أم الدنيا تعلى.. بس قالوا زمان: ليت المطالب بالتمني ولكن تؤخذ الدنيا غلابا.. مش شايفين حد بيبني إلا الغلابة.. والباقي زي السوس بياكل من غير هوادة.. من غير ما يحسب إن الأساس أكتر من كده هيبقى سادة.. نفسي بلدي ما تبقى غابة.. تنصف وترفع كل الغلابة.. ونرمي اللي ما يهموش غير السيادة..