- ترشيحي مع غادة وسيرين وسلافة فخر لي
- هذا الشيء اللي أحب أقوله لجمهوري بـ «تويتر»
بشار جاسم
بدأت نجمة صغيرة وكبرت وهي نجمة وهاهي تكبر أكثر بعز النجومية مع جمهور يعشقها حتى الجنون.. هي شجون أو شوجي كما يسمونها والتي استطاعت ان تخلق لنفسها خطا مختلفا يميزها في الوقت نفسه عن بقية زميلاتها.
«الأنباء» التقت شجون ودردشنا معهـــا، وإليكــم التفاصيل:
شلونچ يا شجون؟
٭ أنا الحمد لله بخير الله يسلمك.
اسمع ازعاج يمچ وناس ينادونچ انت بالتصوير؟
٭ لا والله أنا حاليا بجراند أفنيو بمجمع الأفنيوز وبصراحة المكان خيالي عالمي وإنجاز جديد لدولتي الحبيبة الكويت.
وانت وين مختفية؟
٭ مو مختفية أنا بالأفنيوز (تضحك).
أقصد عن الساحة الفنية؟
٭ والله مثل ما انت عارف في كل سنة وبعد رمضان ومسرحية العيد أكون فاضية واحب هالوقت يكون وقت راحة لأستعد للقادم.
وشنو القادم؟
٭ القادم مسلسل «سر الهوى» من تأليف إيمان سلطان واخراج محمد دحام وبطولة نخبة من النجوم بينهم زهرة الخرجي وبشار الشطي ومحمد صفر.
ودورچ بالعمل؟
٭ أجسد قصة حب مع محمد صفر والقصة تبتدأ بالأخوية وتنتهي بالغرام.
شرايچ ندش بالعميق؟
٭ دش وأنا أوراقي مكشوفة للكل ما أخاف من العميق لأني أعرف أسبح (تضحك).
تعبتي وايد بالفن؟
٭ وايد وايد بصراحة.
ما تفكرين ساعات بالاعتزال بشكل جدي؟
٭ بشكل جدي لا.. بس ساعات من كثر التعب أتحلطم واصير ياهل وشجون الصغيرة تكلم شجون الكبيرة من التحلطم «تضحك».
على طاري شجون الكبيرة.. حسيتي انچ كبرت عن قبل؟
٭ بالفعل أنا بينت اني كبرت للجمهور في مسلسل «كنات الشام» و«شوجي 3».
من شنو خايفة شجون؟
٭ من وايد أشياء يا بشار.. الخوف مثلا من دخولي لـ mbc وأيضا توقيع عقدي مع شركة زين والشغل توسع ومسؤولياتي زادت وجمهوري زاد ولله الحمد.
ألاحظ جمهورچ بـ «تويتر» وايد متعصب ولا يتقبل النقد عنچ وانا أتكلم عن البعض.
٭ صحيح كلامك.
شنو تقولين لهم؟
٭ أقول لهم احبكم وايد وايد وايد واحب حبكم لي وخوفكم علي وحرصكم وساعات لما اقرأ التعصب اللي اهما فيه أستانس وهم أتضايق لما يغلطون أو يعصبون على انتقاد معين.
من اللي ولهت عليه بالوسط الفن؟
٭ ولهت وااايد على أم طلال سعاد عبدالله ولما التقيت فيها بمهرجان تايكي بالأردن حضنتها وسولفنا وضحكنا وإن شاء الله يجمعنا عمل جديد فديتها.
بما انچ ذكرت مهرجان تايكي.. شنو سالفة الجائزة؟
٭ السالفة يا محفوظ السلامة اننا صعدنا على المسرح كنجوم شباب أنا ويعقوب لاستلام جائزة برنامج «واي فاي» لأن الفنان داود حسين صار له ظرف وما قدر يحضر لكن الناس صار عندها لبس اني أنا من فاز بالجائزة وهذا الكلام غلط وانا كنت مرشحة للجائزة فقط.
كلمينا عن الترشيح؟
٭ احنا كنا 300 فنانة عربية تقريبا وانا مع تصويت الجمهور أصبحت ضمن 4 فنانات عربيات وهن غادة عبدالرازق وسلافة معمار وسيرين عبدالنور والحمد لله هذا فخر وإنجاز لي لما أوقف بين هالنجمات وفازت سيرين وانا باركت لها لأنها تستحق الفوز.. وهذا كل الموضوع.
وانت تستاهلين عموما.
٭ تستاهل الطيب يا رب.
باختصار منو شجون؟
٭ شجون طفلة فيها طموح وايد كبير وأبي أسوي كل شيء حلو يرفع اسم بلدي الكويت.
كلمة أخيرة؟
٭ وايد شكرا عالحوار التلقائي وانت عارف ان حواراتكم بالجريدة أحبها وشكرا لجمهوري وأقول لكم أحبكم وايد.