كشفت الفنانة اليمنية أروى عن اسمها الحقيقي، وسر تغييرها له واستعانتها باسمها الحالي، من خلال استضافتها في برنامج إذاعي، وتطرقت خلال الحلقة لبعض التفاصيل الخاصة بحياتها الشخصية، وقالت: «اسمي الأصلي إيمان، وتغير لأن أول ما ابتديت أغني في الخليج كان في فنانة اسمها إيمان وكان صعبا أتمسك به، واخترت أروى بمساعدة أهلي والشركة اللي كانت بتنتج ليا وقتها، ولأن والدي يمني ووالدتي مصرية حبيت اسمي يكون له علاقة باليمن، ومعروفة إن ملكة اليمن أروى الصليحي ومعنى الاسم الراوية او الاستسقاء أي تروي العطش».
وحكت من خلال الحلقة عن موقف غريب تعرضت له بسبب اسمها، قائلة: «قابلت عراف من اللي بيعرفوا الحظ بالأسماء، ورغم إني غير مؤمنة بالكلام ده لكن قالي كلام غريب، قالي إن اسم إيمان وشه مش حلو عليكي، ولازم تغيري اسمك تماما، وكان الكلام ده قبل ما أغني واللي حصل إن بالصدفة غيرت اسمي واتغيرت حياتي، وبطلت احب اسم إيمان، وكل الناس بيقولولي أروى، ولما حد بيقولي إيمان ما بفهموش».
وأضافت أروى: «أنا مش من الناس اللي بتواجه نفسها في المرايا، أنا بحاسب نفسي قبل ما أنام وبيكون تفكيري في الجزء الإنساني أكتر من الشغل».