والدة النجم فواز الميل لـ «لأنباء»: ولدي طموحه الشهرة وحلمه ستار أكاديمي

بشار جاسم «فواز خوش ولد وحبوب وقلبه ابيض وأهوا من زمان حاب يدخل ستار اكاديمي».بهذه الكلمات تحدثت والدة المشترك الكويتي فواز الميل الذي يشارك في «ستار اكاديمي» في نسخته الخامسة حيث قالت: ولدي فواز من زمان وده يدخل في ستار اكاديمي وكان بالنسبة له حلم وتحقق لأن طموحه الشهرة. وعن بدايته في البرايم الاول تقول: كنا مجتمعين كلنا في البيت ومسوين حفلة من تصفيق وتشجيع من اول ما نزع القناع وهذا شعور لا يوصف لما شفناه. وتختتم والدة فواز حديثها: اتمنى انه يشد حيله وابي اشوفه چدام الكاميرا لأنه وايد منعزل عن الفريق كله واوجه له هالكلمة عن طريق جريدة «الانباء» انه يتواجد چدام الكاميرا والله يوفقه ويعطيه على قد نيته. كما التقينا شقيقه الاصغر فيصل الميل وسألناه: شلون شارك اخوك فواز بالاكاديمية؟أهوا كان مقدم من السنة اللي فاتت مع احمد داود وعبدالعزيز الاسود ووصل للنهائي لكن صارت ظروف له منعته من المشاركة وانسحب. وين يدرس فواز؟يدرس في المعهد العالي للفنون الموسيقية سنة ثانية. شنو هواياته؟يحب الطلعات واللبس ودايما يحب الستايل ويحب يلعب كرة القدم. من يسمع له فواز؟يحب الأغاني اللبنانية ومتولع بالفنان وائل كفوري. اول ما شفته بالبرايم شنو انطباعك الاول عنه؟اخوي فواز عموما وايد خجول وناس وايد من اول ما شافوه بالبرايم الاول وبعد البرايم قالوا ان فواز وايد خجول ومرتبك لكن هالشي اكيد في الايام الاولى. شنو علاقته بخالد بوصخر وعدنان السوري؟بدت علاقتهم في مطار الكويت لأن عدنان من سورية ومقيم بالكويت وخالد طبعا من الكويت وصارت صداقة بينهم. وين متوقع يوصل اخوك فواز؟والله العلم عند الله، لكن ودنا انه يكون اهو الستار ويوصل للنهائي ويمثل الكويت. شتحب تقول للمشاهدين؟احب اقولهم نبي وقفتكم وفزعتكم مع ولد ديرتكم سواء أهو ولا خالد بوصخر وان شاء الله في هالموسم يكون الستار كويتي ويحمل هاللقب مثل ما سواها الفنان مشاري البلام في برنامج «الوادي» ومشكورين «يالانباء» على هالدعم.تغطية خاصة في ملف ( PDF )