- السبيطي «مو ذكي».. والچنعده «العوده» في «كُبّر»
إعدادك هادي العنزي
تولع بالبحر والصيد منذ الطفولة، فكانت الأسياف الخطوة الاولى في مشوار الحداق، تعلم أساسيات الصيد الناجح من والده وعرف أسرار صيد أغلب أنواع الأسماك، وعرف نوع ييم الأسماك في فصلي الصيف والشتاء.
صفحة «بحري» تلتقي اليوم الحداق والغواص علي الشيباني الذي يحدثنا عن أهم طرق وأماكن وييم صيد الشعم وكيفية الفوز بالسبيطي ونوع السمكة الحاضرة الآن وأماكنها وأين يتواجد الشعم «العود» وأنواع الغوص الذي يمارس في بحر الكويت والفرق بين غوص السكوبا والفري دايف وأهم أساسيات الغوص ومخاطر الغوص بشكل عام، ومعلومات دقيقة عن الغوص وأماكنه ومخاطره تجدونها في هذا الحوار، فإلى التفاصيل:
تولعت بالبحر وحب الصيد، بدايتي من طفولتي عندما كنت احدق على السيف مع الوالد محمد الشيباني ربي يطول بعمره، وبعدها مع ولد عمتي فهاد العجمي، كنا ننزل بطراد عمي احمد الشيباني نروح الحيشان والرشدان بالصيف والدفان وطبعانة نيكلوس بالشتاء، في الغالب هذه اماكننا ولكن على حسب السمكة وين تكون وايضا نذهب الي الركسة او اقواع عوهة.
الشعم يكثر بالصيف
ويضيف: سمكة الشعم طعمها لذيذ وهذا جعل حداقة الكويت يتوجهون لها وينشهرون بصيدها خاصة ان صيدها ممتع وتكون بكمية كبيرة وموجودة بالصيف والشتاء بالحيشان والرشدان ولكن بالصيف اذا ما عندك شريب ما تصيده لأنه يكون موجود الجم والنويتش بكثرة، والشعم بالشتاء يبي ربيانة المزارع وتلقاه اكثر شي برق طبعانة نيكلوس ورقوق الصبية وكل ما نزلت على الرق صار حجمه اكبر وانا افضل الـ5 قدم ونازل وشرط يكون حمل عشان يكون في جره بالرق.
السبيطي مو ذكي
ويتابع: حداق السبيطي معروف بصعوبته، وللأسف صار بهذه الأيام أصعب، لأنه قل عن قبل وكنت أصيده بالحيشان والرشدان وبطبعانات عوهة وتلقاه بالصبية عند الجزيرة الصناعية الجديدة بشهر ديسمبر ويناير بالرقوق، وبالصيف يدور الميد والزوري والييمة اللي يفضلها مصران الدجاج والزوري الحي وصلاخ الميد والخيط يكون على حسب المكان والغزر، وإذا المكان فيه سبيطي كبير تحط خيط 60 أو 70 واذا حجمه عادي تحطله خيط ناعم مثل 40 او 50 وترديعتك تكون خراري ويفضل الجرة تكون حامية شوي، هذا إذا كنت تفضل الصيد بالخيط لأنه تقدر تصيده بالغوص واقدر اقولك السبيطي مو ذكي نفس ما يقول بعض الحداق لأنه كافي انك تكون ثابت وانت غايص وما تسوي حركة وراح تلقاه هو اللي جايك ومسلم نفسه عشان ترميه وتستمتع بالحجم الطيب خاصة بالزور وحالة الزور.
تسكير الجون والغوص
ويضيف: تسكير الجون خله حداقه وايد يبطلون البحر او يحولون لحداق الجزر او الغوص او التشخيط والجق خاصة وهذا من ذكاء حداقة الكويت وافضل الأماكن اللي يقدر يروحلها الحداق حق النويبي والشعم هي الدعية وأطيان الصبية امتدادا الى الجسر الجديد، والرق يكون فيه الشعم العود والغزر فيه النويبي، وانا من ضمن بعض الشباب اللي ترك الحداق واتجه الي الغوص والأسباب كثيرة واهمها انه الغوص فيه متعة اكثر وحركة وانك تقدر تنقي نوع وحجم الاسمچة اللي تبيها.
أنواع الغوص
ويقول: الغوص فيه نوعان رئيسيان هما:
1- الغوص بمساعدة أجهزة التنفس (الاسكوبة)
2- الغوص بدون أجهزة التنفس (الفري دايف)
غوص الاسكوبا والفري دايف يحتاجان للدورات طبعا لأنه تتعلم فيهما السيفتي اولا ومهارات الغوص وانا ما انصح احد يغوص بدون دوره خاصة غوص الاسكوبا لأنه فيه مخاطر وروتين معين يلتزم به الغواص وغوص الفري دايف لا يقل خطورة والدورات تساعد جدا في تطوير مهارات الغوص وكتم النفس للغوص الحر.
خطر غوص السكوبا والفري دايف
ويضيف: الخطر الذي يتعرض له الغواص يكون على حسب الغوص الممارس اذا كان عن طريق اجهزة التنفس فالخطر الأكبر هو ان الغواص لم يتبع خطة النزول والصعود اي انه تعدى الحد المسموح للغزر ويختلف الغزر اللي يقدر ينزل له على نسبة خليط الأكسحين والنيتروجين في اسطوانة الغوص او انه صعد الى السطح بسرعة اسرع من المسموح بها لكل غزر معين ينزل له الغواص يحتاج انه تكـون صعدتـه بطيئـة ومحسـوبـــة بجدول غوص يتعلمه الغواص المبتدئ بدورات الغوص وايضا لازم يكون متأكد من ان المعدات التي يستخدمها صالحة للاستخدام وما فيها عيوب او كسر لأنه باختصار حياته متعلقة بالمعدات اما غوص الفري دايف فتختلف مخاطره لأنه اول شيء ما فيه معدات كثيرة مثل الاسكوبا ويعتمد اكثر على حذر الشخص نفسه ويحتاج دائما ان يكون معاك مرافق نفس غوص الاسكوبا لازم ما تكون بروحك اولا وتكون انت والذي معاك متفاهمين وغير عجولين بالصيد لأن بحر الكويت غير صاف تماما، فضروري قبل لا ترمي الاسمچه تتأكد وايضا اذا كنت تنزل في عمق لازم يكون شخص بالطراد يراقب الغواصين اذا محتاجين مساعدة والغواص يصير ناجح اذا مرن نفسه عدل ونزل البحر في الموسم الصحيح والمكان الصحيح.
لا تغامر بحياتك لأجل سمچه
ويضيف: اخطر المواقف وابرزها كان في ارياق قاروه وكنت نازل على عمق 20 مترا فري دايف وكنت انتظر سمچه تمر وفي اخر نفسي كنت بصعد السطح ولمحت سمچه شقاره قريبة مني ولم اصعد للسطح واتركها فقررت اصيدها واول ما رميتها لفت على بايب من بايبات الارياق وانا كابرت وما صعدت ريحت ونزلت وهذا المفروض اللي اسويه ولكنني رحت وفچيتها من البايب وانا صاعد حسيت انه بصير شي وكان صاحبي يغوص بقربي فأشرت له قرب مني وانا صاعد مع اول نسم خذيته طحت غشيان لثوان بعدها بطلت عيوني ولقيت صاحبي ماسكني وعدت على خير وتعلمت من خطئي.. ولا تغامر بحياتك لأجل سمچه.
ختامية
واختتم علي الشيباني بكلمة اخيرة قائلا: يا اهل البحر حافظوا على البيئة البحرية علشان الكل يقدر يتمتع بجمالها ويستفيد من خيراتها وربي يحفظ الجميع.