إعداد: هادي العنزي
توارث هواية الحداق أباً عن جد، واكتسب الخبرة الطيبة من عمالقة لهم باع طويل مع الخيط والبحر وأتقن اللعبة، صفحة «بحري» اليوم تلتقي بالحداق يوسف اللوغاني وتدخل معه في تفاصيل رحلته بتعلم الحداق على يد جده ووالده وعمه، وما هي السمكة الحاضرة الآن وقواعد وأصول الصيد الناجح ووقت عبور النقرور وأماكنه وإلى ماذا يحتاج الحداق للفوز بالسبيطي وأماكن صيد الهامور وأوقات صيد الشعم والييمة المفضلة له، كما أطلعنا اللوغاني على وقت صيد الچنعدة وأماكن تواجدها وأين ينصاد النويبي بالجق وما الطريقة الفعالة بالصيد والرسالة التي وجهها إلى المسؤولين لإعادة فتح الجون للحداقة ومعلومات متنوعة عن صيد أغلب أنواع الأسماك التي يرغب بها كل صاحب طراد وخيط.. فإلى التفاصيل:
عشقي للحداق ليس وليد اللحظة فقد ورثت هذا الامر من جدي وابي وعمي ولهم الفضل في تعلمي اصول هذه الهواية وشلون اطور من نفسي فهي تحتاج خبرة وممارسة وتاخذ وقتا طويلا على ما توصل المرحلة المطلوبة بفنيات الصيد، والسمجة الحاضرة هذه الايام الشيم ومكانها الدردور وصيدتها تكون بطريقة الجق وفي الطبعانات على دورة الماية والييمه تكون محاياة يميام او زوري او ربيان واهم شي بحداق الشيم انك تطرح عدل على الطبعانة او المرتفعات اللي موجودة بالدردور لأن الشيم يحب يسبح عندها.
عبور النقرور
ويضيف: النقرور يبلش صيده شهر مارس وابريل وهذه فترة عبوره يدخل الجون بكثرة ونصيده على الربيانة والخثاق وفي الركسة والبوية الصفرا وعند مداخن الصبية وقبل نصيده بالدوحة قبل منع الجون، والشماهي يبين من شهر ابريل ولغاية يونيو بكثرة ومكانه الركسه وعوهه وغرامه الربيانه الجامبو وخيط 90 ورداع ركه.
السبيطي يبي هدوء وصبر
ويتابع: السبيطي سمجه صيدتها صعبة شوي لأنها تحتاج حسبه مايه وييم ومكان معيين وصيده يكون على ماية حمل ودورة سجي وخيط ركه والييم سلس او زوريه حيه او يواف او نغاقة أو مصران دجاج ويفضل ان الييم طري حي تصيده بالساليه وتروح مكانه طبعا السبيطي يحب الاقوع والطبعانات او اذا في ريق اتجابل عليه عدل وتشوح خيوطك وضروري تكون طرحتك عدله بحيث خيوطك تكون تحت الطبعانه او بطرف القوعه واذا موجود راح تصيده ويبي هدوء وصبر.
الهامور في الطبعانات والأقوع
ويضيف: افضل وقت حق عبور الهامور هو شهور ابريل ومايو وسبتمبر واكتوبر وطبعا تختلف قوة العبور من سنة الى سنة، مرة يكون قوي ومرة خفيف، ونصيده بالطبعانات والاقوع على وقفه ودورة الماية وغرامه المحاياه انشكله بالدريه جم او مجوه او شعم حي او راس خثاق والاهم انك تطرح عدل فوق الطبعانة او القوعة والدريه تربطها او تمسكها بيدك علشان ما يقص بالطبعانه او يلحف بالقوعة، ولازم ما تعطيه مجال (ييب عليه)، وبالنسبة حق الشعم هناك نوعان الاصفر نصيده في شهر فبراير بالركسة بحر غزير وخلال شهر مارس يكثر الشعم الاصفر وييمته مصران الدجاج وصلاخة الميد والزوري والربيان ويكون مكانه من الركسة الى الدوحة وعند المداخن ويفضل بحر من 30 الى 50 قدما، والشعم الازرق ينصاد عادة بالرق على الربيانة وطول السنة بالشتاء نصيده على ربيان بالاطيان عند مداخن الصبية وبر كاظمة والحيشان ويكثر في الصيف بالاقوع والطبعانات ويضرب على الشريب.
الچنعدة تكثر بالبرد
ويقول: النويبي اسهل سمچة تقريبا تقدر تصيدها بالصيف ومتوافرة بالاقوع وعلى اي صخر تحصلها بالركسة وبنيد القار والدوحة والدفان وفي الشتاء تصيدها بالاطيان والركسة ومداخن الصبية وقطعة الدعية وحداقها تكون طارح او سماري وتنصاد بالجق بالبحر الصافي والييم ربيان وصلاخ وخثاق وتعتبر من السمج السهل جدا الكل يصيدها، والچنعدة سمجة صيدتها ممتعة ويبلش صيدها شهر اكتوبر لغاية شهر ابريل وتكثر بالبرد وتنصاد تشخيط بالميرور او الجق وعادة تبين في المسايل والفنطاس واذا برد الجو تحصلها عند الجزر مثل كبر وام المرادم والزور وقاروه وبالارياق وعلى حسب العبور كل يوم تحصلها في مكان تحتاج متابعه.
الصيد طرحه
ويضيف: الطريقة الفعالة بالصيد ومن واقع خبرتي المتواضعة هي ان يكون الييم طري وحي والحداق لازم يتعلم انه يصيد ييمه بالسالية ويكون عندك محاياة بالطراد، وأهم شي انك تطرح عدل على المحدق (الصيد طرحه) تذكر هذه العبارة وتحسب انك تحدق في وقفة ودورة ماية سواء سجي او ثبر وافضل حداق يكون في وقفة ودورة ماية واذا التزمت في هذه التعليمات راح تصيد صيد طيب لأنك بذلت السبب.
واختتم اللوغاني قائلا: اكثر شي يضايقني بالبحر رمي الاكياس والعلب الفارغة به وعدم الاهتمام بنظافة البحر، وايضا منع الهواة الحداقة من الصيد بالجون والبحر فيه جميع الاعمار وكبير السن محروم من الحداق بسبب تسكير الجون لانه متعود على محادق قريبة ما يبي يروح بعيد ويحتاج من ساعتين الى اربع ساعات يستانس فيها يرفه عن نفسه ويطلع من البحر والآن يشوف البحر ويتحسر على النزلة نتمنى من الجهات المختصة ان تقدر موروث آبائنا واجدادنا وان يردون الفرحة حق شيابنا وشبابنا ويبشرونا بفتح الجون.