أخبار.. عطوف

أنوار عبدالرحمن عواطف معلمة تعشق نقل الاشاعات، واليوم سمعت حوارا دار بين المديرة والمساعدة أثار شكوكها، وكالعادة دخلت غرفة المعلمات لتنشر هذا الخبر. السلام عليكم يا ابلاتنا العزيزات يتكم عطوف اللي ما في شي عليها يطوف! عطوف ترى عندنا تصليح لي الراس ما لنا خلق قرقتج. المهم سمعتوا آخر خبر. شنوا يا أم الاخبار الطازجة؟ ناظرتنا بتطلع من المدرسة. شنووو؟! من صجج؟! شفتها عند الوكيلة تتحلطم وتتقلطم. لاااا، لا تقولين! وشوي تبجي. وييي مسكينة. ويوم شافتني غيرت الموضوع. الله يعينها. فسويت نفسي أسأل عن جدول أبلة سهام. زين وبعدين. فقالت لي: عواطف توج تسألين عن الجدول؟ فهنيه توهقت. ههههه وشقلتي لها؟ سكت وما رديت جان أطلع. تكفون بسكم من هالاشاعات. من قالج اشاعات أنا شفت بعيني وسمعت بأذني بعد. أوووه حنون لا تدخلين ما تبين تسمعين لا تسمعين. صح صكي أذونچ. خلكم ورى هالكلام اللي ما نعرف صچه من چذبه.. وانتو اللي بتطيحون فيها. كملي كملي مالچ شغل فيها وبعدين اشسويتي؟ رحت للسكرتارية سألتهم اشفيها الناظرة؟ قالوا لي ما ندري ليش؟ اشصاير؟! قلت يمكن بتطلع من المدرسة فتفاجأوا بهالخبر. يعني ما كانوا يدرون؟ لا، فرحت للاخصائيات وسألتهم نفس السؤال وردوا نفس الجواب ما يدرون عن شي فقلت لهم الخبر. أبييه وبعدين؟ رحت لقسم الانجليزي وطلع هم ما عندهم علم بالموضوع، فقلت لهم السالفة. غريبة عادتهم هالقسم يشمون الاخبار عن بعد! وأزيدچ من الشعر بيت حتى قسم العربي والاسلامية والاجتماعيات ما كأن شي صاير بالمدرسة. عيل كلهم اعرفوا بالسالفة منچ. طبعا مو أنا اللي توصل لكم الاخبار اليديدة قبل لا تنزل بالسوق؟! بس الناظرة ما ظن تفكر بهالشي يعني قرار مفاجئ. يا حبيبتي بهالدنيا كل شي توقعي يصير المهم خليني أكمل لچ السالفة. عطوف ترى قلبتي راسي ما دري ليش ماني مستوعبة. رحت سألت الفراشات خاصة اللي امجابلتها وتهربت من كلامي، وبغت تبجي مسكينة أكيد بتأثر لأنها عند غرفتها ومن جم سنة تخدمها. انتي الظاهر محد لازم يعطيچ ويه. عيل سمعوا المهم والأهم. كل هذا وعندچ شي ثاني أهم. عطوف قولي قولي، كلي آذان صاغية. اذا الناظرة بتطلع من المدرسة بتمسك مكانها الوكيلة أو واحدة ثانية، وجذيه بتعسفنا وبتخلينا نمشي عالصراط المستقيم. تبين الصچ أنتي أول واحدة لازم تطبق عليچ هذي السياسة. لا يبا منو هذي اللي تقدر تنزل راسي أنا عطوف اللي ما في شي عليها يطوف! عواااااطف! منو؟ الناظرة؟! تبين تعرفين منو اللي بتطلع من المدرسة؟! الفراشة اللي عند غرفتي! لأ لأ لأ! تعالي المكتب بنتفااااااهم! شي ما شفتوه:عطوف من زمان عن أخبارچ الطازجة ما يبتي لنا شي هاليومين عن المدرسة خبرنا ما في شي عليچ يطوف! احم احم لا يا معودة أنا غيرت نك نيمي صرت عطوف اللي ما تسمع ولا تشوف أهئ أهئ أهئ!