أنوار عبدالرحمن
هناك مسلسل من القصص الخيالية والواقعية، بين أم الزوج وزوجة الابن، في مجــتمعاتنا العــــربية، وهذه لقطة من مــــسلسل ما ينتهي، لا يحمل احدهم دور البطولة!
وي، ما دريت فهد، اليوم اتصلت على العروس، ومستحية حدها يا حليلها.
اشقالت لچ يمه؟ واش قلتي لها؟
اشوف طار قلبك هههه.
طار وبس، الا طار وتصوب.
هههه عاد اثقل شوي جدامها، لا تنغر عليك، قلت لها ترانا نعد الأيام عد، متى بيي يوم العرس يا بنيتي، قالت انا ماعدچ إلا مثل امي الثانية وبحطچ بعيوني، وهذا يوم الهنا اللي بسكن فيه عندكم بالبيت.
شفتي يا يمه ما قلت لچ، بنت سنعه من بيت اجاويد.
في يوم العرس
كلللـــووووش، عسى ما يدور الحــــول إلا اوليدكم يمكم، يا رب اشوف هاليوم قريب.
نبي نستانس يا يمه اول، لاحقين عاليهال.
ان شاء الله بعد سنة والا سنتين يا خالتي، احنا اتفقنا على چذيه، لا تفاولين.
ما عندكم سالفة، اذا كان على الربى، انا بربيه وانتو استانسوا على كيفكم.
بعد سنتين
واااي، يهبل، (فهد اصغير)
لا لا يبا وينه وين فهد، فهد احلى منه بوايد، هذا يشبه امه!
بعد أربع سنين
فهد تكفى، بيتكم صغير ودارين ما يكفون ابي اطلع بسكن بروحي.
يا معوده اش لنا ابهالبهدلة، خلينا ننطر - حالنا حال غيرنا - دورنا في الاسكان، وبقول لأمي تعطينا دار ازيادة.
شوف عاد، لا دار ولا دارين، وامك ما ينقعد عندها، اتطلعني بشقة ابروحي، يعني اتطلعني.
بعد خمس سنين
وين مرت فهد، ما تزوركم؟
وي، مالت، تدز اعيالها علينا، عشان تهيت واتسوق، تزعل والا ما تزعل عند يدي! ما همتني.
بعد ست سنين
يمه، تـــرى طقت چبدي من هالمرة، ما بيها.
ويه، ابركها من ساعة، طلقها، وانت الف واحدة تتمناك، ازوجك اللي احسن منها، وخل تموت من الحرّة!
قبل العرس
يا بنيتي، انتي تدرين ان عنده ولد وبنت، وانا نظرتي ما تخيب، ادري بتصيرين احن عليهم من امهم هالمايقة.
افا عليچ يا خالتي، بحطهم بعيوني، هذولي اعيالي، وفهد يستاهل.
بعد العرس
يمه، ترى مروة تبي تطلع بسكن بروحها.
هوه، ليش؟
تقول تبي تاخذ راحتها.
يا وليدي البيت كله لكم، وماكو غير اخيتك، واخوك مبارك، وتوهم صغار.
يمه، شسوي، ماقدر اجبرها.
ويه، مالت لا من الولد، ولا مرت الولد!
بعد سنة
وااي، يا زينه يشبه اخوانه.
وين يشبه اخوانه يا خالتي، من زينهم، ولدي احلى بوايد منهم!
بعد سنتين
أم فهد، ما نشوف مرت ولدچ الثانية وينها ما تزوركم؟!
طردتها، ما تستحي ولا تنتخي، تطق اعيال فهد جدامي.
ويه، وين كلامها ذاك احطهم بعيوني، واشيلهم بعيوني.
حبيبـتي، قبـــل ما تــــاخذ الـــريل تتمـــسكن وتصيرلچ ملاك، ولما تتمكن تنقلب حية!
شي ما شفتوه
يمه، اشرايچ ارد ام العيال، اعيالي يحنون علي عشان اردها.
ياليييت يا وليدي، تردها، وتكسر راس هاللي عندك!