أنوار عبدالرحمن
الرشاقة حلم الكثير من اصحاب الكروش والاوزان الثقيلة، والزميلتان دانة وبدرية ابتليتا بالوزن الزائد، وتحاولان الوصول الى طريقة مرضية لهما، واتباع برنامج للحمية.
دانوه، ترى مليت من هالسمنة والشحم، چم مرة اقولچ خنتساعد ونبدي انسوي ريچيم؟
تكفين، لا تطرين لي هالسالفة، من اسمعها احس باليوع، وودي آكل حتى الاوراق اللي چدامي.
واااي باسم الله، حشى آفه مو بنت، يعني انتي مستأنسة على هالجسم؟
من فالچ انا مستانسة والا مرتاحة، انا ودي اليوم قبل باچر ابدي بالحمية.
انزين، انا مستعدة دام اني مجابله ويهچ كل يوم من الصبح ابهالوزارة، انسوي لنا برنامج من الأكل نمشي عليه، وعقب الدوام نسجل بأي نادي صحي؟
لا، لا تذكريني بالنادي اللي دخلته، شهر كامل مانام الليل من العوار اللي بريلي وظهري، من كثرة التدريب.
انتي من اقولچ شي، تعترضين؟، يعني زين چذيه صكينا الثلاثين وما يانا واحد، يطل بويهنا؟
المهم جمال الروح، مو جمال الشكل.
روووحي زييين، ونسي نفسچ بهالكلمتين.
انزين انتي ليش محتره هالكثر، قلت لچ اني موافقة اسوي معاچ برنامج غذائي عشان نضعف، بس لا تقولين لي هدي الكاكاو، والوجبا السريعة، واهم شي ما اترك البيبسي ولا الصاج بالمرتديلا والجبن.
واااي بتييبين لي القولون من برودچ، اذا ما تبين اتهدين كل هالسوالف عيل ماكدينا خير؟
انتي اشعليچ مني؟ هذا شرطي اذا بسوي ريچيم.
ياربي، هالبنت دعلة، تبط الچبد؟
بدرية الله يعافيچ، سكري الموضوع ترى صچ صچ، بديت ايوع.
بل، بل، والحين انا اشقاعدة اتكلم معاچ عنه من ساعة كاملة؟، موقاعدة اقولچ، خلاص حنقرر انبطل أكل وبلعة، حتى الفراش كاسر خاطري، باليوم انطرشه امية مرة، يمكن يقدم استقالته بسبتنا؟
تبين الصچ انا يوم شفت ماكو فايدة، كل ما اسوي طريقه للريچيم، ما تنفع وياي، قلت اخليها على الله، والمشكلة حتى اذا كنت زعلانة، اكل بدون لا حس، فقلت يا دانة اش لچ بالقرقة والربربة اللي مالها فايدة، أكلي واشبعي آخرتي بياكلني الدود.
هذا الدود اللي بياكلنا، بالعون بيلقى مخزون فايض لمية سنة ما ياكل احد غيرنا، بس انا ماراح اخلي نفسي چذية بهالحال؟
الحين خلينا من سالفة تخفيف الوزن، ترى ما واطن سيرته، قلت لچ بطني قام يوصوص من اليوع، وابي اتريق، من دخلت وانتي قالبة راسي بسيرة هالريچيم اللي تنكد.
يعني اشلون؟ بنتم چذيه مثل البراميل، وما نحس بالثقة مثل هالبنات الرشيقات، يلبسون على كيف كيفهم من هالموديلات اللي تينن وتارسه السوق، صچ اموت قهر لما اشوف شي ما قدر ألبسه، ولو حاولت وشفت شكلي بالمنظرة، يقولي يامعودة تكفين قطيني؟
بس، بس، فكينا، خلاص بسچ تحلطم، بسوي حمية معاچ والله يعينني.
يا اابعد قلبي يا دانوه، اي چذيه ابيچ، لازم تاخذين قرار حاازم ونبدي بالريچيم؟
بس ها، حطيني على بالچ، انا صچ قررت، لكن مو اليوم، خل نبدي باچر.
صار، اعتمدي، باچر؟
امممم انزين انا يعت من كلامچ هاللي يخلي الواحد يتوتر ويطقه اليوع، شنو نطلب حق ريوقنا اليوم، دام احنا بنعتبرها ختامية.
قولي انتي شنو تبين، يطلب مثلچ؟
اممممم انا ابي ثلاث سندويشات بالصاچ، واحد حلوم وزعتر، وواحد فلافل مشكل، وواحد مرتديلا بالجبنة، وواحد شبس، واثنين بيبسي، وصحن فول، وصحن حمص، نملح فيهم، وكيلو كنافة نحلي فيه.
خوش، وانا ابي مثلچ، بس اشرايچ تأخذ كل واحدة منا واحد بيبسي مو اثنين، عشان نتدرج بالتخفيف من باچر؟
ها؟ رايچ چذيه يعني؟ امممم خلاص أوكيه، واحد بيبسي وامري لله.
شي ماشفتوه:
دانوه، تذكرين يوم تناقشنا بموضوع الريچيم، وقلتي لي بنبدي باچر؟
اي، اذكر، الله يغربل ابليس، اليوع كافر.
انزين، متى يصير باچر؟
هااا، امممم، باچر!!