مجرد.. ازهيوي !

أنوارعبدالرحمن مجرد حشرة صغيرة، أحدثت انقلابا كاملا على نفسيات موظفات محترمات، اجتمعن على طاولة واحدة بانتظار المدير الذي سيعقد اجتماعا مهما معهن، ولكن كيف تصرفن إزاء تلك «الحشرة» المكروهة؟ - السلام عليكم بنات.. ها ما وصل المدير؟ - لا.. قال بيتأخر ربع ساعة عن الاجتماع. - أشوه.. وآنا يايه ابسرعة طايرة.. قلت أكيد وصل قبلي.. وبيزفني ويسمعني چم كلمة بايخة كالعادة. - وااااااااي. - اشفيچ حصة؟ - كأني شفت ازهيوي مر تحت اريولي. - وااااااااااااااااي. - بس.. بس يا بنات اشفيكم لا يسمعكم المدير. - أنت متأكدة انه ازهيوي؟.. - مادري.. بس حسيت جذيه. - ابيييه.. لأ.. لأ ما اقدر أقعد. - ولا آنا.. انزين وين راح؟ - مادري. - يا بنات خلونا اندوره.. يمكن تحت الطاولة.. وإلا لازق بواحد من هالكراسي؟ - وييييييع.. لايكون مر يمي وآنا ما أدري.. وااي يمه قلبي بيوقف. - أنا صوبي ما كو شي. - أكيد انخش ابمكان يوم حس ابحركتنا، ومو ابعيد انه بيطلع بعد اشوي لما ايي المدير ويصير هدوء. - المصيبة لما يطلع واحنا قاعدين.. اش بنسوي؟ - يا بنات ترى آنا ما استحمل.. بظل واقفة وما راح أقعد ليما نلقاه. - دوروه يا بنات تكفون.. ترى جسمي قام يحكني. - انزين لو لقيناه منو الشاطرة اللي فيكم ابتذبحه؟ - لا يحووووشك.. وييييع. - وانا لما أشوفه جبدي تقلب، تبوني أذبحه لايمكن أبدا. - كلنا مانبي انطقه. - عيل ليش اندوره.. خلوه منخش احسن. - من صجچ؟.. آنا لو ما خايفة من المدير يسأل عني، چان انحشت وخليت اجتماعكم هذا اللي ما وراه إلا القرقة.. وانقذت نفسي. - انزين لو قلت لكم آنا بتشجع وبذبحه.. منو اللي فيكم بتعطيني جوتيها؟ - انتي.. بعد شنو. - لو تموتون.. ما أطقه بجوتيي، كفاية اني بتنازل عن برستيجي وأطقه. - وييييع.. لا اتلوعين جبدي.. لو شنو ما راح أعطيچ جوتيي. - ولا وحدة فينا مستعدة تعطيچ جوتيها. - عيل خلاص.. قعدوا على كراسيكم، خلوه يولي. - لا لا لا مانبي... مانبي.. دوروه ابسرعة. - سمعوني يا بنات.. بليز.. عن الصراخ. - قولي اش عندچ؟ - آنا الصراحة مستغربة عددنا عشر بنات وهو واحد أقصاه حشرة، وخايفين منه؟ شنو اهو أسد؟ - يا سلام.. يعني انتي امسوية نفسچ مو خايفة؟.. أشوفچ مساع نقزتي يوم مر الزهيوي تحت ريلچ. - انزين.. عندي لكم راي عشان يطمئن قلبكم. - قولي بسرعة قبل لا يدخل علينا المدير. - آنا أقول.. خلونا انسوي حملة تفتيش حق اجناطنا.. ونفصخ جواتينا، خاف متعلق بريل وحده فيكم. - ويييييع.. لا..لا ما اصدق.. لا اتقولين. - هذا مجرد تخمين.. واللي لابسة جاكيت تفصخه يمكن دش بجاكيتها. - ويييييع.. لا.. لا اتقولين. - هذا مجرد تخمين.. حتى اللي عليها احجاب اتشيله.. مو ابعيد طار فوق راسها وما حست فيه. - وييييييع.. لا.. لا تكفين لا اتقولين. - هذا مجرد تخمين.. اللي شاكة ان الزهيوي داش في.. - بس.. بس.. فهمنا.. لا اتلوعين جبدنا أكثر. - خلاص عيل اتفقنا..؟ - اوكيه اتفقنا. - سكروا الباب يا بنات لا احد يشوفنا.. وعلى هامان يافرعون. شي ما شفتوه- هاااااا؟؟... شنو هذاااا.. مو امصدق عيني؟ - ابيييييه المدير..لأ.. لأ.. لا تفهم غلط.