الجعدة

أنوارعبدالرحمن

بعض الاسر تربي ابناءها «عالبركة»، منهم من تزيد في دلاله، ومنهم من تتعامل معه بشدة، ومنهم من تهمله، واليكم قصة علي المدلل:

• يما لي متى انتي وابوي كلما طلب منكم «علي» شي عطيتوه، حتى لو كنتوا ما تقدرون توفرونه له، واي شي يعجبه يقص عليكم بكلمتين او يتبچبچ عندكم علشان تعطونه اللي يبيه؟
  
• وانتو اشعليكم منا؟ هذا اخوكم الصغير الجعدة، وما يبته الا بعد اربع بنات، خل يتدلل اهو ماخذ من جيبكم شي؟
  
• يمه انتي نسيتي ان عندچ اعيال غيره خالد وسالم؟ والا هذا علشان اهو اصغر واحد بالبيت؟
  
• آنا قلت مالكم شغل فيه، وآنا وابوچ راضين، وكلكم دللناكم بس انتو مايبين بعينكم.
  
• اي.. حچي دللتونا؟ بس يمه لازم اتعرفين ان علي عمره الحين 16 سنة يعني مو اصغير.. وخراب حياته بيكون من ايدكم، اذا كبر ماراح يقدر حتى يدير بيت واعيال.
  
• باسم الله على اوليدي، ولدي ريال عن الف وراح تشوفين اذا كبر اشلون بيصير، بس ربي يكافيه شر عيونكم وعيون الحساد.

بعد تخرجه من الثانوية:

• يبا.. انا نجحت.. نجحت.
• مبروووك.. الحمدلله على هاليوم اللي اشوفك متخرج فيه من الثانوية، اهئ اهئ اهئ.
• يبا عاد لا تبچي على كل شي، الحمد لله افتكيت منها ثلاث اسنين قاعد فيها.
• بشرت امك؟
• اي بشرتها وقاعدة تبچي هناك بدارها، بس يبا نسبتي اضعيفة، وآنا ابي ادش كلية الضباط، ودي اشوف نفسي لابس لبس العسكرية والنجوم على جتفي.
• اي اش عليه ياوليدي دش.. اصلا الكلية تفتخر بواحد مثلك، ما عليك يا وليدي انا بدخل واسطاتي كلهم علشان يقبلونك، ويعطونك النجوم وانت طالب.. وقبل كل اللي بدفعتك.
• انزين يبا.. ترى مليت من سيارتي ابي غيرها.
• يا وليدي ما صار لك ست اشهر من فتحتها.. مسرع ما مليت منها.
• يبا.. سيارة وليدوه عاجبتني.. ابي الموديل اليديد اللي ما طلع للحين منها.
• ابشر بسعدك يا ولدي.. تجيك وعلى هالشوارب بعد.

بعد الزواج:

• علي.. لي متى يعني ما تييب واحد يصلح الثلاجة، صار لها ثلاث ايام اتطلع صوت، وسيارتي ما سويت لها سيرفس، وولدك يبيله تطعيم وآنا قايلتلك تروح معاي.
  
• اووووه.. صچ مليت من هالقرقة، وطقت چبدي من البيت والحنة، ما تقدرين تتصلين عالمصلح يشوف الثلاجة؟ وسيارتچ خلي اخوچ يسوي لها سيرفس، واذا بغيتي اتطعمين ولدچ اخذي امچ او اختچ معاج وخلاص، يعني لازم كل شي آنا.
  
• وانت الحين يعني امسوي شي بهالبيت؟ آنا اللي شايلته فوق راسي، وانت قاعد بس اتدلل حسبالك للحين ياهل عند امك، بس آنا المقرودة اللي طحت بواحد مثلك، صچ الحب عمي، قلت لاهلي احبه وماراح اعيش مع واحد غيره، ولو معانديني چان احسن.. اي حب واي بطيخ؟!

بعد ثلاث سنوات:

• يمه اهئ اهئ اهئ.
  
• اشفيك يا وليدي تبچي.. ياخلف طوايف اهلي.
  
• يمه.. ابي اتزوج.
  
• شنو ؟ تتزوج؟ ومرتك اش فيها؟
  
• مابيها.. ابي اغيرها.
  
• هو؟ اهي سيارة عشان اتغيرها؟
  
• اي.. ما قمت احبها.. وايد حنانة، وما اتدللني مثلج.
  
• يا وليدي.. منو مثل الام ؟!.. بعدين انتو توكم شباب اصغار والدنيا بتعلمكم، وراح تفهمون بعض اكثر كل ما تكبرون.
  
• لا.. يمه آنا ما استحمل انطر هالسنين كلها، وآنا تعودت يمه اصارحچ بكل شي.. آنا.. آنا احب وحدة ثانية اكبر مني بست سنين ومطلقة وعندها اعيال.
  
• علي.. من صچك؟
  
• يمه الانسانة اللي اخترتها.. فاهمة وعاقلة وعندها خبرة بالحياة وحنونة واتحبني وايد، وما يهمني مطلقة والا ارملة والا حتى لو عندها درزن اعيال، آنا ابيها يا يمه ابيها.. اهئ اهئ اهئ.

شي ما شفتوه:

• علي.. مبروك يقولون تزوجت.. بس اشلون قدرت تفتح هالبيتين، وانت اللي طول عمرك امدلل ولا احد يضايقك بشي؟
  
• حاط لكل وحدة سيارة وسايق.. علشان يفكني من طلبات البيت، وكل وحدة عندها معاشها وما عليهم قاصر.
  
• انزين، اشلون عايش بينهم؟ انت قايلي ان الاولى اصغر منك والثانية اكبر منك.
  
• الاولى اقول لها انتي الصغيرة الحلوة واول حب وتستانس وماتدري شتسوي عشاني، واذا رحت للثانية الكبيرة وقلت لها: وقفت ضد الناس علشانچ، تحطني على صدرها وتقولي شبيك لبيك.
  
• انزين بسألك سؤال.. قولي ابصراحة انت منو تحب؟
  
• تبي الصراحة.. آنا احبهم كلهم.. ههههه.