متى؟

أنوارعبدالرحمن

حوار دار بين صديقتين عن موضوع زواج صديقتهما الأجنبية.. لنستمع له:

• حيا الله من يانا.. اتصدقين عاد صارلي يوم وأقول بيني وبين نفسي.. مادري شخبار خوله مو عادتها ما تمر علي بالبيت وتشرب عندي استكانة شاي.
• صچ هالأيام وايد لاهية مع أبوي توه واصل الكويت.. والحمد لله سوى هناك العملية وانجحت.
• إي نسيت أقولچ الحمد لله على سلامته.. ترى كلمت أختچ هدى وطمنتني عليه.. بس غريبه هالمره ماسافرتي معاه.
• هالمرة ماقدرت آخذ إجازة من الدوام.. مع ان د.سوزن اللي تعالجه دزت لي ايميل تبي تشوفني تقول ولهانه علي.
• ياحليلها.. للحين اتراسلچ.. شخبارها.. وشخبار اعيالها اللي كل واحد منهم يدرس بولاية.
• وي.. نسيت أقولچ ههههه.
• شنو.. ضحكيني معاچ.
• أول شي.. طلعي ولدچ صويلح هاللي صاير هالأيام لزقة ويقعد مع الحريم.. ويقط الأذن.
• حرام عليچ.. ولدي وينه وين هالسوالف؟ مسكين.. يلزق يمي من كثر ما آنا لاهية عنه في الدوام.. يبي حنان.
• عبورة الله يخليچ طلعيه بلا حنان بلا بطيخ.. چم مرة فضحنا عند ريلچ.
• ماتشوفينه قاعد يلعب ماعليچ منه قولي سالفتچ.. شوقتيني.
• كنت بقولچ ان د.سوزن اللي تعالج أبوي قالت لي انها بتتزوج بعد اسبوعين مع احتفالاتهم مالت رأس السنة.
• وي.. ليش اهي اتطلقت من ريلها ذاك؟
• لا.. أصلا أهي مو متزوجة.
• شنو؟ اشلون يعني مو متزوجة.. ودازتلچ اصور اعيالها اللي يدرسون بالجامعة.. وقاعدين مع أبوهم في المطعم؟
• هههه.. صح هذولي اعيالها.. وذاك أبوهم.. بس ما كانوا متزوجين.. والحين قرروا بعد هالعمر يتزوجون.
• من صچچ؟ لا أبيييه.. مستحيل.
• اشفيچ أهم عادي عندهم هالشي.
• اتهقين اعيالهم يدرون بهالسالفه اللي تفشل؟
• أصلا اعيالها يوم دروا إن أمهم وأبوهم قرروا يتزوجون.. قالوا لازم يحضرون مراسم الزواج ويسوون حفلة كبيرة.
• استغفر الله.. اللهم لا شماتة.
• عاد آنا قلت لازم أدز لها هدية بمناسبة زواجها.. اتهقين شنو اعطيها؟
• هههه اش هديته هذي اللي بتعطينها إياه.. وهي امجابله ويهه أربعة وعشرين ساعة.. زين ما مل منها وهدها وخذا وحدة ثانية وتزوجها.. عالأقل يعتبر زواج صچي هالمرة.
• أوووه.. عبورة.. عن الغشمرة.. لازم أدز لها هدية.. وبطاقة صغيرة أكتب لها اهدائي.. بكلمتين حلويين.
• آنا.. اقترح تدزين لها قلب ذهب حلو لأنهم يموتون عالذهب.. وكتبي لها «وأخيرا بعد قصة حب دامت لأكثر من عشرين سنة.. أثمرت شجرتها بأربعة أبناء جميعهم بصحة وعافية.. لا بد أن تكلل بخاتم الزواج لأنكم أثبتم انكم الآن قد المسؤولية وتصلحون تكونون زوجين».
• زين.. اتنكتين بعد؟ اشرايچ أكتب بآخر سطر من الكرت.. «ليش مستعيلين؟».
• إي.. حلوة.. كتبي ههههه.

شي ما شفتوه:

• يبا.. متى تتزوج أمي؟
• شنوووو.. من وين يايب هالحچي ياصويلح؟!