تكفون لا يكون؟!

 أنوارعبدالرحمنقبل يوم من رمضان يتني رسالة على موبايلي من رقم غريب خارج الكويت، كانت مكتوبة بالانجليزي، قلت يمكن في ناس عندهم نظر بعيييد لمقالاتي، وحابين يتواصلون معاي ويتعرفون علي عن قرب، يمكن اكتشفوا في زاويتي شي ماشفته ولا شفتوه، ويبوني أكتبها لهم هناك بجرايدهم. المهم يوم قريت اللي مكتوب (وحدة تتشيحط عاللي مايعرفون عنجريزي، خاف صج؟)، لقيت أني في يوم وليلة فايزة بسيارة مرسيدس اس ال بقيمة 140000 دولار، والبلد بأفريقيا السوداء (ما شاء الله عليهم خبري أثنين عندهم بس يسوقون مرسيدس الرئيس ومرته) يعني زين واصلة عندهم بعدد كبير لدرجة قاموا يوزعونها على الأوادم بره بلدهم، خاصة للفقارى مثلنا اللي عايشين بالخليج، وما نعرف شنو يعني مرسيدس! طبعا تفاجأت بالرسالة، لكن تذكرت رسالة قديمة كانت عبارة عن فوز بمبلغ معتبر، وكان ودي يكون صج بس قلت لازم أسأل 107 عن السالفة، فردوا علي وقالوا لي انهم مالهم شغل باللي يوصلنا من رسايل وأغلبها يكون فيها نصب، بس وحدة قالت لي شيضر لو سألتي واتصلتي عالرقم وشفتي السالفة يمكن صج احسن ما تطوفين المرسيدس، والصراحة كلامها صار بأذني مثل الوسواس الخناس، وقلت عالأقل أشوفها جم تسوى بالكويتي، انزين بس وين هالديرة هذي صايرة؟!.. امممم مو عشان آنا كاتبة صحافية لازم أعرف خريطة العالم وجغرافيا المدن وأسوي نفسي أعرف كل شي مثل بعض الناس، هالديرة وين يا جماعة الخير؟ (وحدة قفل مخها مع الصيام) مو هذي في قارة أفريقيا مكانها بالنص أو تقريبا بالجنوب؟.. إي ذكرت بعض البرامج عن هالبلد، اللي شعبها يطلعونهم ساعات في التلفزيون حاطين اعظام حيوانات فوق روسهم (يعني شباصه )، ويلبسون لبس مثل قطعة صغيرة من جلد النمر، واعتقد أهم اللي يلبسون احلقة كبيرة في اخشومهم للزينة والجمال، وإلا يلبسون الحريم ملوتهم مثل الاطواق بس يحطونها برقبتهم وتصير اشطولها، يعني إذا بتعرفون أن الرقبة ممكن تطول وتتمدد وتصير متر ونص تلقونها عندهم، بس احنا ارقابنا عبارة عن دور واحد بالمقارنة بارقابهم ما نقدر نمدها دور ثاني، مممم لا يكون بعد هذي خدعة منهم عشان آنا عايشة بالكويت ويحسبون ان بيتنا تحته بير نفط (وحدة بدت تفكر بشكل ثاني)، ودزولي هالمسج عشان يستدرجوني ويقطوني في جدرهم الكبير ويفوحوني بالماي إذا أهلي مادفعوا لهم الدية؟ (نهاية امرأة شجاعة) لا ومو بعيد يسوون احتفال بطقوسهم الغريبة اللي تخرع يرقصون ويغنون حول الجدر من وناستهم، وانهم صادوني ويزيدون الخشب عشان أصير عظام (فركيته) حق روسهم؟ (ها؟.. تكفون لايكون بعد؟) لا يا معودين، مابي المرسيدس إذا كانت السالفة جذيه، شنو آنا بايعة عمري (احد قالها إن السالفه صج جذيه؟) امممم بس ممكن أروح إذا الفكرة عن هالديرة مو اللي طرت على بالي، وحرمتني من النوم (جنها صارت قصيدة ) ولكن المهم يدفعون لي سعر التذكرة والفندق وسيارة الأجرة، ويوفرون لي 10 بودي قارد للحماية، وغير هذا يحسبون حساب المحرم اللي معاي، (إي.. حلمي وايد) لكن منو هاللي بيرضى يروح معاي أفريقيا هناك، لو يمكن أوربا محد راح يقول لي لأ، تدرون اشلون خلوني أفكر مرة ثانية بالموضوع (المرة ريضه بعد بتفكر). شي ما شفتوه: جم ايميل ياني يقول لي فزتي بكذا وبكذا، وآنا هذي مهنتي بس ألغي وأحذف واتحلطم، ومنها العيش في كندا (انزين يصير آخذ ديرتي حبيبتي معاي؟)، يا عااالم حلوااا عن سماااي!