حميدي.. يلمع عقاله

 أنوارعبدالرحمن

     تماشيا مع الحدث الذي أثير في الساحة، وقامت قيامته بين مطبل ومعترض، أكتب لكم هذا الموضوع.

سلمان مع حميدي:ِ

• حميدي.. اش سالفتك هالأيام كل مادخلت الصبح مكتبك تسكر على نفسك الباب.
• الصراحة.. أقعد ألمع عقالي.
• وليش تلمع عقالك؟
• عشان بيزورنا الوزير.
• ويعني إذا بيزورنا الوزير لازم تلمع اعقالك؟
• إي اشعبالك لازم يتلمع.. مثل الجوتي.
• هااا؟ مثل الجوتي؟
  
  سلمان في قسم الشباب:
  
  
• يا جماعة الخير أنا مالي شغل بالموضوع هو اللي قال هالكلام.
• لا يكون ناوي على نيه؟
• أنا اللي علي قلته لكم، ومايندرى اشبيصير، الله يستر.
• تدري اشلون؟ خله يلمع عقاله يمكن يحذف العقال على الوزير هالظالم اللي كل يوم امطلع لنا قرار تعسفي، ويطقه فيه طقه ما تنسي.
• يا معودين ترى السالفة مهي سهلة فيها تحقيق وبلاوي.
• أنت مالك شغل، بس تصدق لو يسويها، راح انسوي احتفال لا صار ولا استوى، وانصور عقاله ونشيله ونلف فيه بكل الوزارة ههههه.
• آنا اقترح نسوي لوحات مرسوم فيها عقال وجوتي، عشان يكون الاحتفال أكبر وعلى مستوى شعبي، والا انتوا اشرايكم؟

سلمان في قسم البنات:

• سمعتوا يا بنات، بسالفة حميدي
• لا.. اشفيه؟
• كل الإدارة تتكلم وانتوا ماتدرون.
• قول، اش صاير؟
• حميدي كل يوم يلمع عقاله، ويوم سألته ليش؟ قال عشان زيارة الوزير ولازم يلمعه مثل الجوتي وانتوا بكرامه، وآنا خايف يسوي سالفة كبيرة، تدرون إن الوزير بياخذ جولة بين الإدارات، أخاف ناوي يحذفه فيه؟
• ابيييه، لأ.. لأ، لا يكون.
• ترى حميدي هالسكوتي مو بعيد يطلع منه هالشي.
• وااااي سلمان، ياليتك ما قلت لنا، احس كل وحده فينا قامت تتراعد من الخوف.

يوم زيارة الوزير:

• حضرة الوزير تفضل، هذي الإدارة طال عمرك فيها موظفون أكفاء، وهذا الاستاذ حميدي وحضرتك عارفه عدل.
• والنعم.. ممكن إذا تسمحون أكلم استاذ حميدي اشوي.
• يا بنات خلكم بعيد ترى الوزير قاعد يكلم حميدي، ترى حانت ساعة الصفر.
• يا شباب خلكم جاهزين للتصوير من دون لاحد ينتبه لكم، مايندرى يمكن تشتري منكم الوكالات الصور.
• يا بنات تعتقدون الوزير اشقاعد يقول لحميدي، أنا حاسه ان في شي بيصير.
• يا شباب أنا حاس بيصير شي، حميدي حط ايده على اعقاله.
• (أفا عليك يا حضرة الوزير، هذا عقالي لك أقطه، خلاص اعتمد)
• هاااا؟

شي ما شفتوه:

• شفتوا شلون، استعجلتوا بالإشاعة، طلعت السالفة (بوش)، الوزير بيستجوبونه، وحميدي من أهله وبيفزع له.
• بس غريبة تصير سالفة مثل هذي جدام الموظفين بالوزارة.
• عادي.. صار كل شي غريب عادي.
• أنا أقول، شيلوا اطبولكم وصور العقل والجواتي اللي تحت ادراجكم، وكملوا شغلكم أحسن هههه.