دورة متقاعد

 أنوارعبدالرحمنبعض الزوجات أصبحن يشتكين من أزواجهن، الذين أصبحوا بعد فترة التقاعد يتدخلون في كل صغيرة وكبيرة بأمور البيت، ويسببون إزعاجا حتى لخدم المنزل، وها هي زوجة بو صويلح، تشتكي زوجها وشدت معه في الحوار. بو صويلح، اش عندك من الصبح قاعد تدور ورا الخدامات وتتحلطم؟ ما تشوفينهم اشلون يلعبون بالماي، على بو انهم يغسلون الحوش، والماي يهدر ولاهم حاسين من السوالف والقرقة والضحك، ما تقولين لي بعد هالصرف بالماي، منو راح يبتلش بالفاتورة؟ وانت اش عليك منهم؟ الماي هذا اللي قاعدين يستخدمونه ماي صليبي، وبعدين انت مالك شغل فيهم، وانا حذرتك ألف مرة لا تتدخل بشغل الخدامات، آنا المسؤولة عنهم. انت خامدة للضحى العود، وما تدرين اش قاعد يصير في البيت، هالخدم يلعبون لعب في الماي وصرف الكهربا وغير الأكل اللي نشتريه ولا ندري عنه وكله ببطونهم، أنا عالأقل صاير أقعد من الساعة 7 الصبح وأشوف أش قاعد يصير من ورانا بهالبيت. آخ يا ربي، يا ليتك ما تقاعدت وظليت بشغلك أحسن لك من هاللويه والقرقة من الصبح، أو عالأقل لقيت لك شغل ثاني، وتنقلع عن ويهنا وتخلي الكل بحاله ويرتاح من أذيتك. أدري اني من تقاعدت وأنت مو عاجبج قعدتي بالبيت وتبين الفكة مني، لكن أنا قاعد بهالبيت على اجبودكم. بعد أسبوع: قومي يا مرة، بسج نوم. اشتبي بعد، بدينا بالحنة، أصبحنا وأصبح الملك لله. روحي شوفي خداماتج اللي يبون طلبات للبيت، ما تقولين لي شنو سالفة الصابون والكلوركس، اللي ما يمدي الأسبوع يمر إلا قالوا خلص. اللي تييبه يكفي أسبوع بس، وانت تدري وتسوي نفسك ما تدري، وكل ما قلنا لك ييب للشهر كله، قلت لأ، تدري ليش؟ لأنك مستانس كل ساع اتطل ابويهك وحدة منهم واتطيح معاها سوالف على بو انك تسأل عن أغراض البيت. اهبي هبيتي من مرة ما تستحين ولا تنتخين، آنا أسوي جذيه، ما قول إلا صج انقردت فيج. اسمعني زين، إن ما بطلت من سوالفك هذي لأفضحك عند اللي يسوى واللي ما يسوى. أنا أقول لو فيج حيا اشــــوي، جان قمتي من الصبـــــح مثل هالخدم وحطيتي بالج على بيتج، مو تقضين الوقت بالنوم وبالتلفونات وإلا عند جاراتج، وما كأني موجود. بعد تبيني على آخر عمري حالي حال الخدم، كفاية فيني أمراض الدنيا بسبتك، حتى ريولي زين تشيلني، وتبيني أدور ورا الخدم؟ أنا قايل من أول، انج عجوز وما وراج فود، لكن يا رب يعطينا العافية ويطول بعمري، الظاهر إن ما حد بيدير باله على حلاله وبيته غيري آنا. يعني ماراح تيوز من سوالفك. ها؟ أي سوالف هذي بعد اللي تتبلين فيها علي؟ شي ما شفتوه: بعد يومين: شنو هذا؟ هذي آخرتها يا بو صويلح تغسل الحوش مع الخدامات؟ لأ.. لا تفهمين غلط قاعد أعطيهم دورة اشلون يغسلون الحوش ويحافظون عالماي والصابون شنو؟ تعطيهم دورة هااا؟.. يا ليت يوم الحكومة عطت أمثالك التقاعد، سوت لكم مدارس داخلية، عشان عقول اللي مثلك ما تنحرف، ولا نشوف شيفتكم إلا آخر الأسبوع.