Note: English translation is not 100% accurate
تعلموا الحلاقة برؤوسنا!
الثلاثاء
2006/9/5
المصدر : الانباء
عدد المشاهدات 1492
بقلم : مشاري العدواني
اذا طلبوا منك في اي وزارة طوابع ورحت تشتريها من الماكينة اللي «راح تكون خربانة» راح تلقى عامل واقف بجانبها، بتعطيه 11 دينار: 10 طابع، ودينار حقه لانه «حلاق الطوابع»!
عندما تريد شراء قطع غيار لسيارتك ستجد 8 انواع غير اصلية، وراح تشتري وتسكت لانهم «حلاقين الغيار»!
اذا دعمت بسيارتك وصلحتها بـ 1000 دينار واستلمتها وبعد يومين اكتشفت انها للحين خربانة، راح تبلعها لان «الحلاق الميكانيكي» قال لك «تؤبرني وعلى راسي»!
ان قررت تشتري كمبيوتر من حولي راح يغشونك بجهاز، اهل الطواقي المذهبة لانهم «حلاقين حولي»!
ان وقفوا معاشك بدون سبب ورحت تراجع الادارة المالية في وزارتك راح يقولك واحد «معليش» اصل انا موظف جديد، فراح تبلعها وتسكت لانه «حلاق المرتبات»!
ان بغيت تنتدب او تنتقل او تعدل وضعك راح اتراجع الديوان وراح يلفلفك مليون لفة وبعدين يمكن يرفض المعاملة لانه كل شيء بمزاج «حلاق الخدمة»!
ان شريت من البقالة وكان حسابك 750 فلس ورجعلك 200 فلس من باقي الدينار وسألته وين الخمسين راح يرد عليك ويقولك «انا غالتان بابا» راح تسكت لانه «حلاق البقالة»!
ان رحت تشتري ملابس حق عيالك وكانت الاسعار نار راح تبلعها وتسكت لانك مالك خلق اتراجع حماية المستهلك وتشتكي على «حلاقين الملابس»!
ان عطوك دواء بالغلط او غزوك ابرة هواء ومت، اكيد راح تسكت لانك ميت، ولان «حلاقين الصحة» راح يقولون لك كومستاكي بابا انا يبي يقعد داخل كويت 2 سنة بعدين يروح مستشفى داخل اميركا!
مسكينة يا كويت كل حلاقين الدنيا اللي ودهم يتعلمون الحلاقة برؤوس القرعان يتعلمون برؤوس اهلها..
وفي كل مجال من مجالات الحلاقة!
اقرأ أيضاً