دقت أجراس المدارس، فبعضها بدأ الدوام والبعض الآخر بعد أيام قليلة، لذا يتبادر لنا سؤال مهم عن أخبار لجان جماعتنا واجتماعاتهم في وزاره التربية؟ فمنذ أن بدأت الاجازة الصيفية للمدارس انطلقت التصريحات التربوية للتجديد في الخطة التربوية على مدار 3 شهور ونحن نقرأ التصريحات الرنانة «وكأننا مقبلون على دخول المونديال»، المهم ان التصريحات واللجان المنعقدة فوق المستوى واجتماعات متخصصة وجداول وتعيينات ونقل يمين ويسار ودراسة مناهج تقول داخلين حرب مو وضع خطة تربوية للعام الدراسي الجديد المهم شنو جديد وزارة تربيتنا: محلك سر؟
بتقولون ليش متشائمة والناس للحين ما بلشوا برد عليكم: الجواب يبين من عنوانه، بتسألون: اشلون عرفت؟ السالفة يا جماعة الخير ما تبيلها قراءة فنجان ولا تفسير أحلام، نقول بسم الله الرحمن الرحيم ونبدأ المشوار معاكم عشان ندلل على أن كلامنا «صح»، ربعنا في وزارة التربية افتتحوا مدرستين في الجهراء جزاهم الله خير، بس ربعنا نسوا أن يؤمنوا طلبتهم حيث قام مسؤول تربوي وصرح في الصحف وقال ترى إحنا فتحنا مدرستين بس متخوفين من العزابية اللي بجانب المدارس ويمكن نطلب سيارة شرطة عشان الأمن. السؤال: مو لازم قبل البنيان تقومون بدراسة للمنطقة ومعرفة المخاطر وإلا مو سامعين شي اسمه «الأمن والسلامة» وهالمرة مو عالمباني لا على عيالنا، خلصنا من المدرستين وترى مو بس المدرستين اللي ذكرناهم، ترى المدارس كلها أعتقد ان الصيانة لم تأت صوبها والأيام بينا وترى للحين الصيف موجود وخلينا نشوف المكيفات شخبارها في فصول عيالنا، وبين هذه الزحمة نسأل سؤال على الطاير: شنو أخبار الكاميرات يا جماعة الخير وإلا للحين ما وصلت من هوليوود؟
ننتقل من المباني والصيانة والأمن وسلامة عيالنا ومدارسهم إلى الجداول وتطويلها وتقليصها، قرأنا تصريحا في بداية الاجازة الصيفية عن تطويل اليوم الدراسي وقبل أيام قليلة من نهاية الاجازة فاجأنا تصريح وزاري عن تطويل اليوم الدراسي مصاحب له نماذج للجداول المدرسية بجميع مراحلها والخاصة بأوقات الحصص الدراسية وياريت الخبر ما نزل في الصحف وبدت اللوية بين نوابنا وبين المسؤولين في الوزارة، السؤال: وين جماعة اللجنة التعليمية في مجلسنا الموقر مو المفروض قبل الاعتماد من وزارة تربيتنا يبعثون نسخة لهم عشان لا يعورون راسنا؟ والا السالفة صارت تصريحات ورفض وسؤال برلماني ومنو اللي ضايع بالطاسة اعيالنا واحنا بعد؟
ونختم معاكم بالسؤال: شخبار الكتب المدرسية جاهزة والا نفس كل سنة في نقص بالكتب عشان أزمة الورق؟ ويا جماعة الخير شخبار الوجبات المقدمة للطلبة لجنتكم خلصت أم انها للحين قاعدة تسوي «بوفيه» ولا بتكون الوجبات «الا كارت» وعلى الطاري بنستعد على هوشة برلمانية عشان مناهج التربية الإسلامية وإلا شلون اللون؟
كلمة وما تنرد: من أشعار الإمام علي عليه السلام:
من كان مفتخرا بالمال والنسب
فإنما فخرنا بالعلم والأدب
لا خير في رجل حر بلا أدب
نعم ولو كان منسوبا إلى العرب
[email protected]