قال الأمير البلدْ مَحْدٍ إيضايجها
إحنا أَهَلْهَا إذا حجتْ حَجَايجها
منا لها الود والإخلاص دايم دومْ
وأبْكلْ الأوقات نَحْچي عن مباهجها
واحنا وقفنا معاها ابيوم جَمْعتْنا
ابْروح قوية وطَفّينا حرايجها
الله معاها وَهُو مع أهلها الطيبينْ
عاشت وتمت إخْطاها في مدارجها
تدري أَهلها ابْكِلْ اقلوبهمْ معها
والناس تدعي لها الرحمن خالجها
يا رب تحمي ابلاد الخير والإحسان
وأهْلٍ فضلْهُم ابْدَاخِلْها وخارجها
يومٍ طرق بابها المقْرود بالعدوانْ
قامت وما كان من خوفٍ إيعالجها
لكنها صَدِّتَهْ عن بابها واقْفَى
وراحت اتَدوِّر عن العزَّهْ ابطرايجها
إمشيْ ابدربچ وَلِچْ منا العمل دايمْ
تشهد له الأرض وتشهد له خلايجها
قال الأمير الكلام الذي يسر الناس
واللي اقلوب الأَهَلْ كِلْهم إيمازِجها
اليوم نواف جانا واحنا كِلنا اجنود
نمشي على خطته او نرفع بيارجهَا
هذا بو فيصل معاه الخير كل ما راح
في ديرة تطلبْ إنه ما يفارجْهَا
في حب الكويت يبذل كل ما يقدر
ومنه نرى الخير، چنَّهْ نُورْ بارجها
كل الأهالي افرحوا يوم بدا نواف
يدرون انه ابعاداته أيوافجها
تمشي على الشّور ديرتنا ابْدربٍ خَضرْ
ما كِلْ الأديار للديرة اتسابجها
أهُو العطوف الذي قلبه علينا صار
فيه المودة وللخيرات سابجها
يحمي احْماها أوْ يبْعدها عن الأشرارْ
ويضربْ ابعزم امضايجها وبايجها
هو قال كونوا ابحذَرْ كلكم يا هَلْ الدار
لا تسمعوا هرجة ما فاز هارجها
يا اعيال صيروا لها سورْ ابتعاونكم
وانفوسكم دوم تفزَعْ صوب خالجها
نرجوه إنْها على طول الدهر تبقى
في عز دايم وكل الخير لاحجها
خَلْكُمْ معاها ابوقت الضيق هي أمكم
اتضيق فينا ورب العرش فارجها
٭٭٭
قال الأمير أَوْ حِنَّا ما نسينا له
موَدَّةٍ في ضمايرنا اتخالجها
هذي الكويت اللي لنا حبها زْودْ
«إحنا أهلها إذا حجت حجايجها»