(1)
عيد الوطن ظلل علينا وجانا
نرجو من الله فيه يصدق رجانا
ويا رب وفجنا وتَمم هنانا
لكويت منزلنا ومنزل أهلنا
نِحِنْ إليها في سفرنا وْحلنا
ونطلب لها في كل حال اتهنا
وتْكون نيَّتها على ما نوينا
(2)
يا عيد الأوطان باقْبَالِكْ أمانينا
يِقْبِلْ علينا وبقبالك اتهنينا
كل الفرح فيك وكل المفخره فينا
لكويت تطلع لنا في كل زينتها
في يومها اليوم تسعدنا ابفرحتها
واحنا سعيدين فيها وْفي معزتها
عادةْ بلدنا جميع الخير تعطينا
(3)
اليوم هذا عيدها عطر الكون
واليوم أهلها من فرحهم يَهتْفون
مثل الكويت اْبْطيبها ما تلاقون
لها الوفا منا وزود الموده
نخلص لها إخلاص طايفٍ أبحدّه
ونقول عشتي ابخير من غير شده
اهيا لنا عون وْحِنَّا لها عون
(4)
اعلامنا فوق القصور المنيعه
مرفوعة عن كل ظالم رفيعه
احنا ابحماها كل أمر نطيعه
صار الوطن في كل الأقطار معروف
وابكل ما يرفع له الراس موصوف
طوف البلاد وْسايل الناس واتشوف
لكويت روض يوم وافي ربيعه
(5)
أهْل الكويت الكرام ابلادهم حره
ما يقبلون الردىَ والضيم بالمره
أو يسكتون إن وصلهم سُوْ من بره
راياتهم فوق طول الوقت مرفوعه
لا يقبلون العدو وافعاله ممنوعه
وْعينه إذا جد في مسعاه مشلوعه
يلقى السلاح وْيِصْلَى عندنا حَرَّهْ