بشار جاسم
راشد الهلفي مذيع يمتلك كاريزما جميلة، ويتمتع بحضور لافت على الشاشة الصغيرة، يحب برامج المسابقات، ولا يميل الى نشرات الاخبار، ويؤيد قرار غالب العصيمي بأن المذيع يجب ألا يمثل.
يتكلم الهلفي اللهجة البيضاء، ويفتخر بانه بدوي، ويشوف ان المذيع لما يدير برنامج فيه جمهور ويعرف شلون يتحكم بالمكان كله شي حلو.
عنده الحين برنامج حواري على القناة الثالثة، وهو برنامج رياضي يقدم كل يوم جمعة، ويلفت الى انه قبل لا يكون مذيع، كان معد برامج وبعدها صار مذيع، لأن التلفزيون يقدم الانتشار، نقاط عدة تكلم فيها الهلفي برحابة صدر في التفاصيل الآتية:
تقدم حاليا برنامج بعنوان «بوم المهلب» وفكرته تقوم على نفس فكرة برنامج «مهرجان صيف دبي»، هل لديك تعليق؟
هالبرنامج صار له للحين 3 سنوات وأنا أقدمه في هالسنة، واللي كان يقدمه قبلي المذيع عبدالمحسن البرقاوي، بس ماني فاهم وين التقليد اللي تقصده؟!
التقليد موجود في روح البرنامج، وحتى طريقة الجوائز والصناديق والمفاتيح مع احترامي لطاقم البرنامج.
والله ما دري، ومثل ما قلت لك ان هذي أول سنة أقدم فيها البرنامج، وبعدين الجوائز موجودة في اغلب البرامج، وعموما أنا ما شفت برنامج صيف دبي.
ظهرت في البرنامج بلوك جديد والناس تعودت عليك بالدشداشة والغترة والعقال والحين انت لابس سبور.
مقاطعة.. يضحك، نعم ظهرت في بعض البرامج بلبس سبور مثل برنامج المدينة الترفيهية، وعموما البرنامج اللي يتطلب هاللبس راح ألبس سبور، يسأل: ليش مو حلو؟ يضحك.
لا بالعكس كوول بس أنا أقصد أن الناس تعودت عليك بالدشداشة.
وأنا ما أبي الناس تمل من شكل معين، والتنويع حلو وعلى حسب نوعية البرامج.
تحس ان برنامج بوم المهلب يضيف لك شيئا؟
ماني فاهم شتقصد؟
أقصد أنك تقدم برنامج جوائز وجمهور يعني ما في شي جديد.
بالعكس أنا شايف ان المذيع لما يدير برنامج فيه جمهور ويعرف شلون يتحكم بالمكان كله شي حلو.
إيه بس انت مو في برنامج حواري انت مجرد انك تلقي السؤال والناس تفوز.
أنا ماني معاك في هالشي، وبعدين أنا غير، هالبرنامج عندي برنامج حواري.
شنو البرنامج الحواري؟
عندي برنامج حواري على القناة الثالثة، وهو برنامج حواري رياضي يقدم كل يوم جمعة وبالنسبة لبرنامج المسابقات، أنا أحب نوعية هالبرامج، وأعتز بها تجربة ميدانية، ونحن كمذيعين عرفنا شلون نستخدم أدواتنا اللي استفدنا منها بالدورة الخاصة بالمذيعين.
علي طاري الدورة متى تخرجت منها؟
تخرجت منها سنة 2004.
تفاصيل الحوار في ملف ( pdf )