Note: English translation is not 100% accurate
الرويشد: «ويني» نقلة شبابية وجديدي أغنية لبنانية
السبت
2006/12/16
المصدر : الانباء
سعود الورع
صادق في كلمته وعفوي في بسمته، وليش جمهوره كل دنيته، حب الناس له ميزته، ومن كثر ما احساسه مرهف قام يغني برومانسية كلها سلطنة، كل هذا وأكثر شفناه وعرفناه بعبدالله الرويشد اللي فتح قلبه لـ «الأنباء» في احلى دردشة استطعنا من خلالها ان نغوص في اعماقه ونعرف منه آخر اعماله وانتاجاته.
وليش انه الدردشة عفوية صار هذا الحوار مع سلطان الرومانسية:
شخبارك بوخالد عساك بخير؟
بخير الله يسلمك ويسلم «الأنباء».
اشرايك ندردش اشوية عن الفن؟
ارجوك سعود اعفيني.
الله ترى اعفيني خوش اغنية اشدراك اني بسألك عنها؟
(يضحك) لا جد خل الحوار بعدين.
ليش بعدين انا قاعد وياك ولازم احاورك، ما يصير عبدالله الرويشد معاي وما احاوره؟
وليه، بوناصر الله يهديك صاير تحن.
صدقني ما راح ابطل حنه الا لما تعطيني حوار حلو؟
الحين مـــاقدر، لان وايد صحافيين اطلبوا مني حوار وقلتلهم لما ينزل ألبومي الجديد.
ادري بس انا مجابلك صارلي 24 ساعة من چذيه الحوار لازم يصير؟
يبا خلاص سوي حوارك، بس اول شي اشتشرب قهوة ولا چاي؟
ما عليك امر ماي، أقول وينك هالايام؟
انا في بيروت.
عيل ليش تقول «ويني» بألبومك الأخير؟
يضحك ويقول: كاني قاعد وياك مع احلى اثنين قاسم عبدالقادر وعبدالله القعود.
فجأة قاطع دردشته مجموعة من جماهيره في بيروت، ودار بينهم وبين الرويشد هالحوار:
الجمهور: كيفك عبدالله احنا كتير معجبين بألبومك الأخير شي بعقد.
الرويشد: الله يسلمكم وهذا من ذوقكم وشرف لي لأن اللبنانيين جمهور متذوق للفن ومزوء.
الجمهور: بدنا بألبومك الجديد تغني شي غنية لبنانية.
الرويشد: من عيوني الثنتين وتامرون أمر.
الجمهور: نتمنى لك اقامة سعيدة في بلدك الثاني لبنان.
الرويشد: مشكورين وما قصرتوا على كرم ضيافتكم.
شنو راح تقدم اغنية لبنانية بألبومك الجديد؟
ان شاالله من چذيه جمعني لقاء مع الملحن طارق ابوجوده وفي مشروع تعاون بهالخصوص
.
شنو هالتعاون ممكن نعرف؟
للحين في افكار واذا اتضحت الامور راح ابلغك.
اشصار على مشروعك التربوي اللي راح تقدمه للاطفال؟
«الأنباء» انفردت بالخبر وعندك كل المعلومات.
ادري بس بلشت فيه ولا للحين؟
بدأنا نحط الخطوط العريضة، والحين قاعد نجهز للعمل، كما ان الشاعر عبداللطيف البناي مشغول الآن بكتابة بعض الاغاني للعمل، والشاعر سامر العلي هم قاعد يجهز اغاني للعمل التربوي، والالحان راح اقوم بتلحين جزء منها والجزء الآخر راح يتولاه الملحن سليمان الملا.
يقولون انك بلشت بالاعداد لألبومك الجديد؟
وليه امصمم تحرجني مع الصحافة بعدين اقولك خلها بوقتها
ميخالف بوخالد هالمرة خلها بويهي، وقولنه شوية عن ألبومك؟
لا سعود خلها مرة ثانية.
انزين يقولون والعهده علي الراوي ان في تعاون بينك وبين خالد الشيخ وعبدالله القعود؟
(يضحك) اكيد بوعمر اللي قالك.
انزين خل نكمل كلامنا عن ألبومك الجديد؟
كل ما في الموضوع قاعد اتصل شبه يومي بالفنان خالد الشيخ لانه قاعد يجهزلي اغنية من ألبومي الجديد، وخذيت اغنيتين من الملحن عبدالله القعود، واذا خلصت نهائيا من تجهيز الالبوم راح اخصك بمعلومات عنه.
مشكور بوخالد، بس متى تجي ألو «الأنباء»؟
وعد مني خلال الايام القليلة القادمة أكون في «الأنباء» للتواصل مع احبابي القراء.
اقرأ أيضاً