يا الله يا عالم خفيات الإنسان
يا سامع نبض القلوب العفيفه
يا مكون الكاين وعالم بالأكوان
يا محصي خط القلم بالصحيفه
نحمدك يا والي على جمع الإخوان
على الفعول الوافيات المنيفه
جمعتهم في موقف يرفع الشان
أسعد قلوب أهل الخليج الشقيفه
صاغه وقاده طيب الصيت سلمان
أبو فهد عز الشعوب الضعيفه
موقف شرف موقف حزم كله اتقان
أنقذ بلاد أهل اليمان النزيفه
اللي اعبثوا فيها محبين الافتان
أهل النفوس الطامعات التليفه
ما صانوا المعروف عاثوا بالأوطان
خلو وليف الدار يقتل وليفه
سقو بذور الشر في كل ميدان
يرجون تحقيق الحلوم المخيفه
لكن بفضل الله ثم أهل الإيمان
خابوا وخابت كل يد حليفه
ردوا يشيلون الندم فوق الأحزان
وقلوبهم ترجف ونسمع رجيفه
شافوا عواصيف الحزم نصرها بان
شافوا خليج العرب يشطر بسيفه
سيف يقص الحق ما يظلم انسان
ما يقتل العاني ولا يستخيفه
يحفظ حقوق الناس من كل بهتان
ويسمح ادروب القلوب الكفيفه
ما هو بسيف اللي له الروس ثعبان
يقتل ولا يرحم أرواح رهيفه
ما قدر اكبار ضعيفين شيبان
حتى الطفل يرسل عليها القذيفه
له يوم يبكي ويفرك اليد ندمان
ويرحل من الدنيا بطعنات سيفه
ويبقى خليج الخير رمز ونيشان
وعند الشدايد له مواقف عنيفه
يدعم رجال الخير في كل الأثمان
ومن ينتخي به بالنخاوي يضيفه
ويا الله يا رحمن نرجاك الامان
وحفظ الخليج من النفوس اللهيفه
نرجاك تدحر كل فاسد وطمعان
ينوي يذر الشر بأرض مريفه
وسلم لنا قاداتنا نبع الإحسان
وخليجنا وكل الديار الشريفه
ومن خاطر صادق له الحب عنوان
أشكر زحازيح الرجال العفيفه
شكرا لبوناصر وشكرا لسلمان
شكرا لابن زايد ودار الخليفه
وشكرا تميم وشكرا لكل الاوطان
اللي افزعوا لجل البلاد النزيفه
الله يبيض وجهكم طول الأزمان
ويديم رايات السلام الرفيفه
موقفكم الحازم له بقلبنا شان
توحيدكم زال الهموم الكليفه
توحد البلدان وصفوف الأبدان
جدد حسابات البلاد الحليفه
خلاهم يقرون مابين الأذهان
مو كل واحد يفعل اللي بكيفه
وعسى يدوم الود مابين الاخوان
وتبقى المحبة والقلوب النظيفه
الشاعر الأديب: هاني عبدالرزاق القعود النبهان