نظم الشاعر الكويتي الملا علي الموسى السيف (1875- 1946م)
القصيدة التالية في مدح الملك عبدالعزيز آل سعود عام 1934م بمناسبة العلاقات الوطيدة والوثيقة بين المملكة والكويت.
أهلاً وسهلاً مرحباً وبْدي سلام
اتحيةٍ قلبي ايرددها مديم
مني سلام للملك ولد الإمام
الحاكم اللي مع سعة حكمه حليم
ملكٍ ترجّاه الدول شرقٍ وشام
كلٍ يخاف ويرتجي فضل عميم
لا مَعن لا الْبرمك ولا حاتم شمام
ولا سمعنا بالعرب مثله كريم
ولا تجيب البيض مثلاته حرام
عز العرب ناموسهم حبرٍ فهيم
من حاربه عَيَّتْ عيونه لا تنام
على العدا سمٍ وللصاحب سليم
من سمع بفعاله عرف قولي تمام
ملك الملوك اكعامِ من هُوْ لَهْ خصيم
حكمه عَدِل والكل مرغد في كمام
في ظل ملكٍ جِعْل عزّه يستقيم
ما صار مثله في قديمات العوام
ولا تواريخٍ تذكّر من قديم
حرٍ شهر حاش الفخر وعْلى مقام
نال المعالي والمكارم والنعيم
هداه ربي يوم ولَّاه الاسلام
صحيح لي من قالوا الحاكم حكيم
واللي رفع راسه وله قصد ومرام
باق العهد بلاه وغواه الرجيم
هذاك راح ادْعاه ابو تركي عدام
جازاه في فعله بقى نسله يتيم
واللي سلم قادوه غصب في خزام
بدايدٍ ربي جعلها حام حيم
ما فاد تجسيم الاصايل والجهام
أيضا ويومر بالكساوي للحريم
كثر العطا ما فاد فيهم والطعام
قالوا نبي مكه وحايل والقصيم
تجاسموا نجد كلامٍ في كلام
والحكي ما بين الفعل فرقٍ عظيم
الحكم جا فيما يقصّنَّ العظام
اسيوف هندٍ وأُمْ خمسٍ يا غشيم
الحكم ورثٍ من جدود ومن عمام
وفعلٍ يشيّب راس من توّه فطيم
كم كون في كونٍ تهيا وزدحام
لما حصل ذا الملك من فضل الكريم
عساه يسلم للعرب دوم الدوام
هو حرزهم هو عزهم ذخرٍ مقيم
والختم صلّى الله على خير الأنام
محمد اللي قام بالدين القويم
إهداء من د.وليد حمد السيف (حفيد الشاعر الكويتي الملا علي الموسى السيف)