الجاسر: أي شيء ما أسوّي هطول السنة أسوّيه في رمضان
من الأشياء الجميلة في شهر الخير وشهر الصيام أن يكون لكل فنان ولكل إعلامي جدوله الخاص الذي يكون مختلف عن باقي الأشهر ومن الأسماء التي لها دور واضح في خريطة الإعلام والتقديم الإذاعي المذيع محمد الجاسر الذي يتحفنا دائما بالبرامج التي يقدمها عبر أثير إذاعة كويت إف إم، «الأنباء» التقت الجاسر فكانت هذه الدردشة البسيطة للتعرف على جدوله في شهر رمضان والأشياء التي يحرص على عملها:
محمد شلونك؟
بخير الله يسلمك.
شلونك مع رمضان؟
يا أخي هالشهر هذا له طعم خاص في حياتي وعلى كثر ما الناس تنطره إلا أنا اتشفق على حضوره وأحس انه روحي تنولد من جديد من كثر ما أحب كل شيء في شهر الخير وكافي ان الشهر اللي أنزل فيه القرآن الكريم وعسى الله لا يحرمنا منه ونكون من عواده بإذن الله.
اللهم آمين... محمد شنو الشي اللي تحرص إنك تسويه في هالشهر بالذات؟
شوف بوليد أنا أهم شيء عندي إني أتواصل مع ربي قبل كل شيء والواحد مهما يسوي لازم يكون عنده خط رجعة مع الله سبحانه وتعالى وخاصة في هالشهر لازم شوي نخلي الاجواء الروحانية تطغى ويصير لها مكانة في قلبنا من ناحية صلاة القيام أو التراويح أو قراءة القرآن وأشياء كثيرة الواحد إذا سواها يصير أقرب حق الله سبحانه وتعالى وما ننسى نفسنا من الدعاء لأن الله سبحانه وتعالى طلب منا أن نكثر الدعاء.
أما الجانب الآخر في هالشهر واللي اعتقد أنه كل واحد يحرص عليه أن نتواصل مع الأهل لأن هالشهـــر يسمونه شهر الرحمة والتواصـــل واللي ما فيه خير مع أمه وابيه واخوانه ما فيه خير لنفسه والله لا يحرمني من عائلتي اللي لولاهم ما اعتقد اني وصلت الى هذه المرحلة الحمد لله.
وشنو الشغلات اللي تخصك وتحرص انك تسويها؟
والله كل الأشياء اللي ما أسويها طوال السنة تلاقيني أسويها في رمضان ومثال على ذلك أنا بعيد عن ممارسة رياضة المشي ولكن في هالشهر تلاقيني مطيح في الممشى وتشوفني مستمر وأحاول أن أبذل جهدا في المشي عشان دقات قلبي تنتظم أكثر والنسم يكون بشكل أفضل حق التقديم في رمضان خاصة.
وشنو البرامج اللي تحرص انك تتابعها؟
والله كثر من البرامج ولكن إذا حبيت أحدد أنا تعجبني البرامج اللي يشارك فيها الجمهور وتكون فيها مسابقات واسئلة، الواحدة يستفيد منها خاصة إذا كانت المعلومات تخلي الواحد يستفيد ويحس انها راح تفيده وتزيد معلوماته.
كلمة أخيرة لقراء «الأنباء»؟
طبعا مشكورين وما قصرتوا على هالدردشة الحلوة واللي تخلي الواحد يتواصــــل مع القارئ والمستمع بشكل أكبر وطبعـــا ما أنسى أشكر كل من ساندني وكل من وقف معاي وأقول حق الجميع عساكـــم مـــن عـــواده وعسـى إن شاء الله أيامكم كل رمضـــان فرح وعبـــادة وتواصــــل ويبعد عنا الكـــره والحسد ونرتقي بأعمالنا وتكون الكويت اهيا همنـــا الوحيد ونحاول نحافظ عليها في كل شـيء نملكــه.
عمر العثمان: أنا أحب أحوس في المطبخ الأكل في رمضان يصير أحلى
خالد السويدان
السفرة الكويتية خاصة في رمضان لها مذاق مختلف عن باقي الأشهر طوال السنة، فالكل يبدع في الأكلات سواء كانت على وجبة الإفطار او السحور أو حتى في الغبقات، لذلك ترى الجميع يتلهف ليرى ما هو الجديد على السفرة ولكن مع هذا التطور ووجود الوجبات الجديدة إلا ان معظم الناس لا يستغنون عن الأكلات الكويتية القديمة والتي أصبحت صنفا اساسيا في كل سفرة، «الأنباء» التقت نجمي برنامج «whats on» عمر العثمان وجاسم العبوة للتعرف على ما هو أهم شيء عندهما في الفطور في رمضان فكان هذا اللقاء:
مرحبا عمر؟
هلا والله فيك.
مرحبا جاسم؟
يا هلا والله مراحب.
اول شي مبارك عليكم الشهر وعساكم من عواده.
جاسم + عمر: الله يبارك فيك وعساكم من عواده في الخير والرحمة والتواصل مع الله سبحانه وعلى الامة العربية والاسلامية واهل الكويت كلهم يا رب.
عمر نبي نعرف شرايك في الأكل في رمضان؟
انت طقيتني على الجرح.
شلون؟
لأن انا انسان ما اقاوم شيء اسمه اكل، خاصة اذا كان من يد الوالدة الله يحفظها لي فتشوفني احوس بالمطبخ قبل الفطور أتطمن واشوف شنو مسوين لكن اذا صارت حزة الفطور ما اكل شي.
ليش؟
لأن في طبق ما اقدر اقاومه واللي اهيا «التشريبة» تشوفني خلاص انسى كل الأكل اللي موجود على السفرة وما آكل الا التشريبة واحيانا اشرب شوربة وبس اكون مكتفي وأشبع بسرعة الحمد لله.
وانت جاسم شنو الشي اللي ما تقاومه؟
عاد انا حق الاكل ما اقول لأ كلش لكن قاعد احاول احافظ على صحتي من خلال أكلي واخاف انسى عمري واخربط وايد لأن ما ادري هالشهر الأكل كله يصير حلو والكل يحاول انه يتفنن حتى في المطاعم أكلهم يختلف يصير احلى لكن الوجبة اللي لازم كل يوم اشوفها على السفرة حتى الفطور «الدولمة» او الورق العنب والكبة هذولة لازم ابلش فيهم وطبعا بعد الفطور لازم صب القفسه واللقيمات.
عليكم بألف عافية وعساكم على القوة.
الله يقويك ومشكورين وما قصرتوا على هالمجهود وعساكم من عواده وعلى اهل الكويت كلهم يا رب.