جديع الملعبي
jedealmlaby@
شمس الجفا بانت بلا فجر وزراق
ومن دون لا حتى المشاعر.. يشعرون
ياطعنة الغالين يامُر المذاق
تبكي الظماير والمحاجر يضحكون
جار الرفيق بخوتي والصدر ضاق
ولفى الكدر.. من كل شكل ولون
للواحد اللي رافعٍ سبعٍ طباق
برفع يدي.. وافتح محابيس العيون
يارب انا عبدك وضاق بي الخناق
اني عزيز(ن) خانته.. كل الظنون
كل مافعلت الطيب لعيون الرفاق
جازوني بفعلٍ ردي.. مايستحون!
ودي اجحد النكران لكن مايطاق
ليه الحبايب في بعضهم يطعنون
ماعاد تحتاج الولايف للعناق
لا تشكي الحرمان يالقلب الحنون
وفيت في وقتٍ كثر فيه النفاق
وصدقت مع نفسي وغيري يكذبون
وفتحت صدري للتصالح والوفاق
وكتمت غيظي والمشاعر يزفرون
وان كان بعض الناس عاشق للفراق
مابعد تصديق الظنون/ إلا الجنون
الشمع ما اغلا قيمته بالاحتراق
وبذل العطا ماتجحده كثر الديون
وش يجلب الدخان غير الاحتراق؟
وش يضفي الليل العتيم إلا السكون؟
رفعت شرهاتي وفي حلقي شهاق
عشان لاكبيتهم.. مايشرهون
ناسٍ مصالحهم ورا العلم الدقاق
ودايم على جلب المصالح يتعبون
اعوذ من خوة كثيرين النفاق
ياليتهم على الجباه.. يّوسمون