أنوار عبدالرحمن
فضيلة وصديقتها حدث لهما موقف لا تحدسان عليه.. فقد تركهما «عزوز» في السوق وهما في دولة أجنبية، على ان يرجع إليهما بعد ساعة.. ولكن طال الانتظار، فقررتا الرجوع الى الفندق وحدهما.
- فضيلة.. شوفي التاكسي اللي اهناك خنأشر له.
كاهو شافنا، الحمد لله ماراح حق اللي واقفين اهناك، زين الله امسخره لنا.
- جنه معاه ولد شباب؟
اي هذا الولد قاعد جدام.. المهم خنوصل الفندق.
- عاد اتعرفين انجليزي؟
شويه.. يعني أطقطق.
- تبين الصچ.. ولدچ هذا عزوز ما يستحي على ويهه اللي هدنا ابهالسوق واحنا بالانجليزي ميح.
اشدراني عنه وين ذلف!.. حسبي الله على عدوه من ولد.. حسباله احنا بالكويت يقولي اتسوقوا وارد لكم بعد ساعة.
- اي ساعة؟!.. الحين صار لنا بالسوق ثلاث ساعات.
بليز.. بليز.. هوتيل.. شيراتون.
- فضيلة.. تهقين فهمنا؟
اشدراني يا معودة.. الله يستر ماينحاش فينا.
- قصري صوتچ.. اللي قاعد جدام شكله اعربي.
اسمير چنه اعيالنا، يحليله من طقة اوليدي.. انا بس أحاتي هالعزوز إذا يا ومالقانا.
- قلعته.. في واحد يسوي اسواته.. يخلينا حريم كبار بالسوق بهالغربة.. ما نعرف راسنا من كرياسنا.
أنا خايفة أحد قص عليه وباقه، يشوفونه أسمر وخليجي يحسبون عنده بير نفط.
- ولدچ هذا من يبيه؟.. من زينه؟
شنو؟.. ولدي أصلا لا شافوه هالشقر.. ينوا عليه.. والله طقه الملح والزين.
- سكتي بس سكتي.. القرد بعين أمه غزال.
شنووو؟!
- قصري صوتچ استحي.. لا يسمعنا الريال.. من ركبنا واحنا انهذر.
حريم ما علينا شرهة.
- انا ودي أكلم هالولد اللي معانا يمكن يطلع صچ اعربي.. عالأقل يدلي هالسايق.
بس أهو شكله فهم.
- ما يندرى.. وخوفچ يوصله قبلنا.. وانا وياچ نتوهق اشلون نتفاهم معاه.
خلاص.. إذا نزل الولد نقوله جزاك الله خير كلم لنا هالسايق يودينا لفندقنا.
- أنا كل ما شفت حالتي چذيه أقول صچ العلم نور واهلنا الله يرحمهم مايهمهم إلا البنت تتزوج وتروح لريلها وبيت الحموله.. ويروح عمرنا وماشفنا إلا الشقا ولا تعلمنا شي للزمن، عيل هالأمراض اللي يتنا من اشويه؟!
صاجه.. وإذا زعلنا ردونا اهلنا.. يقولون.. المرة مالها إلا بيت ريلها.
- وين زمان الحين.. وين أول.. شوفي بنات الحين.. كلما قالها زوجها ادني لي وراج.. طقتها زعله وراحت بيت أهلها.
اتصدقين عاد يافضيلة.. أنا لا شفت هالأجانب وكل واحد وكشرته ابويهه.. أقول هنيالهم ما يشيلون هم مثلنا.
- اشلون ما عندهم هم؟.. بس كل بلد ولها اهمومها.. ومشاكلها.
ما شاء الله عليچ عيني عليچ باردة.. أنا لما اسمعچ تتكلمين مثل هالحريم المتثقفات أقول.. المفروض عندچ الدكتوراه.
- أنا لو امخليني المرحوم أدرس چان شفتيني اشلون.. أشوه اني قمت ألقط چم كلمة انجليزي من اهنيه واهناك وإلا چان اعلوم، أنا كل ما شفت هالحريم اللي يترززون بالتلفزيون، أقول شالفرق بينا وبينهم كلهم من طقتنا.
هو! اشيابهم حقي؟! هذولي من طقتچ انتي، وإلا نسيتي چم سنة بيني وبينچ؟!
- صچ ما عندچ سالفة.. اللي يشوفوني وياچ يقول اني اصغر منچ.
قال والا ما قال، المهم منو انولد قبل؟ وبعدين شاللي بتاخذينه إذا قالولچ شكلچ أصغر مني؟ لا يكون اتفكرين تتزوجين يا فضيلة عقب المرحوم.. ياخزياه؟!
- أنا ما قلت چذيه.. مع انه يارنا بوموسى خطبني.. بس قلت لا.
إلا بناته اوقفوا بويهه.. وقالوا له.. يبا بعد هالعمر اتفكر تتزوج؟!
- اشفيها؟ مرته وماتت من چم سنة.. وبعدين اهو كان خاطبني قبل المرحوم.. والحين شاللي يمنع؟!.. ماقول إلا الله يرحمك يابو عزوز.. خذيتني وانا ياهل ماعرف كوعي من بوعي.. وانت شايب ومرمرتني تمرمر.
فضيلة.. اشهالكلام اللي ماله سالفة الحين.. والميت ما تجوز له إلا الرحمة؟
- وانا اشقلت يعني؟.. قلت الله يرحمه!.. الظاهر قاعدة اتصيّدين عليّ.. بس سكري الموضوع.. محد مدقرني غيرچ انتي وعزوز ولدي!
أقول.. فضيلة.. جنة هالتكسي رايح لفندقنا؟!
- ها؟.. صح.. هذا شارع فندقنا.. ياحليله أكيد الود قاله وصلهم قبلي.
الصراحة كبر ابعيني.. لازم نشكره أول ما ننزل.
- الحمد لله.. وصلنا يالله نزلي.. ثانكيو تاكسي مان.. هاو مج..؟!
ههههه يازين الانجليزي بحلجچ.. نزلي يمه.. نزلي.
- منووو! عزوز؟!.. انت اللي قاعد يم السايق؟!!
شنو ما عرفتوني؟!.. صچ انكم عيايز.
- الله يستر.. الجربة وبطيناها!
شي ماشفتوه:
يمه.. صچ أخطبچ جارنا بوموسى.. ووافقتي.. أول مرة اسمع بهالسالفة.. قولي لي.. اشقاااعد يصير من ورااااي؟!
- لا.. لا يا وليدي من صجك؟!.. أنا أتزوج بعد أبوك؟!.. أنا أصلا حالفة محد يدخل قلبي غيره، لين أدخل قبري!
إيه، عبالي بعد!
- ماقول إلا (هذا ويهج ياحيفه.. حتى لو غسلتيه بليفه) مالي إلا أصك حلجي واسكت.. صچ اللي خلف ما مات!