أنوارعبدالرحمن
طيبة وجمانة صديقتان لكل واحدة منهما همومها الخاصة، توجهتا مع أبنائهما إلى أحد المولات لقضاء وقت ممتع هناك.
- طيبة.. اشرايج نقعد على هالطاولة ونشرب لنا قهوة والا عصير بارد، مدام اليهال قاعدين يلعبون بالألعاب جدامنا ومستانسين.
- انزين على احسابج هالمرة.. والا على احسابي مثل كل مرة؟!
- لا.. مثل كل مرة ههههه اتغشمر معاج.. على احسابي ولا تزعلين.
- عيل طلبي لي عصير جزر خنريّح اعصابي شوي.
- طيبة ترى من دخلنا السوق وأنتي مالج خلق.
- جمانة آنا وين يصير لي خلق وأنا بلوتي مع أخوي هاللي واقف ابويهي مو امخليني أطلع بشقة آنا وعيالي بروحنا.
- ردي كلميه مرة ثانية وثالثة ورابعة بعد.. مثل ما قلت لج ليما يمل ويوافق.. وأهم شي تفهمينه إن المشكلة أساسها مرته هاللي ماتحشم أحد.
- عيزت أتكلم معاه.. وماكو فايدة.. أذن من طين.. وأذن من عيين.
- الصراحة مثل أخوج ماشفت ابهالزمن.. يصبر على مرته.. خبرنا العكس.
- هذي لو كانت عند ريلي أقصد طليقي.. جان زتها من الباب من أول أسبوع.
- زتها؟!.. انتي من وين يبتي هالكلمة الداثرة؟! آنا برأيي لو تردين حق ريلج دام قاعد يحاول يراضيج.. أبرك لج من أخوج ومرت أخوج.
- لا إن شاء الله.. عوع.. عساني ما أرد له.. عوووع.
- اشفيج.. قمتي اتدقين هرنات.. عوع وعوع.
- مادري عنج!.. تبيني أرد له وهو للحين على خماله؟!
- بس الله يعافيج شربي عصيرج ترى ذاب الثلج اللي فيه.
- الثلج لو ينحط على قلبي جان صار يغلي.
- طيبة.. شوفي اللي اقعدوا على الطاولة اللي يمنا.
- اش هالشقرة المدربحة.. ومعاها ريّال كويتي؟!
- شوفيه اشلون طاير فيها.. كشرته من اهنيه لي اهنيه!
- امصيبه هذول اللي احظوظهم قايمة مو احنا.
- طالعي اعيالهم اشلون صايرين.. شقر.. ولا واحد منهم يشبه أبوه.
- إي... يا خلاف!
- بس الصراحة اش ملحه.. مو مثل هالماصخة اللي يمه مستانس ابشقارها.
- طبعا.. اش ياب لياب!
- تراه من مساع يطالعنا.. حاس ان احنا قاعدين نتكلم عنهم.
- بس سكتي لا يسمعنا ويهبدنا بهالكرسي اللي يمه.
- خلاص يامعودة.. ماعلينا منهم.. كملي سالفتج.
- أقولج رحت لعمتي نورية.. وقلت لها سالفة هالنسرة اللي عند أخوي.. عشان اتكلمه وتقنعه.
- واشقالت؟
- قالت لي يا ابنيتي.. ترى أخـ..
- طيبة.. شوفيه.. ابسرعة شوفيه لا يطوفج.
- شنو اللي لا يطوفني؟
- حط ولده الصغير بحضنه وعطاه رضعته وحط العصير جدامها.
- منو؟
- الكويتي اللي معاه مرته الاجنبية.
- يا ويلي.. بس خلاص.. مالج شغل فيهم.
- اتوقع بالبيت يسوي معاها أكثر من جذيه؟!
لو مرته كويتية ما سوا معاها جذيه.. واعليا علينا!
- أنا أعرف الاجنبيات وطبعهم.. غصبا عليه الريال يساعدها.. حاله من حالها.
- اتهقين اهي تحبه ومتعلقة فيه.. مثله.. والا عشان افلوسه؟
- علمي علمج.
- اعتقد هذا لو يرفض لها طلب ويقول لها لأ.. جان شالت شليلتها وانحاشت مع اعيالها.. وبعدها ما راح يدري عن هوى دارها.
- جمانه الله يعافيج.. عيزنا واحنا انخز فيهم.. يا انقوم من هالمكان وإلا انسولف عن موضوع ثاني.
- أففف.. كملي.. كملي سالفتج مع عمتج.. ياليتنا مايينا هالمكان!.. اشلون بنام الليلة.. آآخ يا القهر.
شي ما شفتوه:
(في البيت)
- بو عبد الله.. حبيبي.. عطني الصحن اللي يمك.
- هاج.
- حط لي كشب شويه بصحني.
- اممم.. هااج.
- مايخالف تحط لي اشوية بطاط.
- اففف.. هااااج.
- اشرايك اتوكلني بيدك الحلوه؟
- هااا؟.. شنو؟!!.. جمانة.. اشفيج اليوم؟! من رديتي من السوق وانتي قاعده اتدلعين عليّ.. الظاهر انتي ورفيجتج دخلتوا السينما وشفتوا فيلم حب وخرابيط.
- لا.. ما دخلنا السينما.
- سمعيني.. ترى مايلوق الدلع عليج الحين.. موحسبالج احنا بشهر العسل.
- المفروض المتزوجين كـل حياتهم عســـل!
- هااا؟!!...ههههه كح كح كح.
- باسم الله عليك.. اشفيك غصيت؟
- الصراحة ضحكتيني.. وماحد قالب راسج إلا هالكتب والمجلات اللي تقرينها..المهم خلي عنج هالسوالف وسمعيني.. ترى عندي لج بشارة قبل لا أنسى.. وش ناطره من زمان.. قولي شنو!
- قول.. بشر.. زادوا رواتبكم والا عطوك درجة.
- لا.. لا هذي ولا هذي.. اختاروني من ضمن المجموعة اللي بتحضر المؤتمر بأميركا.. وأزيدج من الشعر بيت.. بعدها عندنا جولة بأوروبا.
- هااا!!.. أميركا.. وأوربا، لأ لأ آآآه ياراسي.. الحقني بيغمى عليّ!
- اشفيها هذي اليوم؟!!