أنوارعبدالرحمن
مديرة مدرسة أمرت المعلمات بحملة تفتيش على الطالبات، وكانت هذه النتيجة..
- ما شاء الله تبارك الرحمن.. كلكم مخالفات.. يا بخت المدرسة فيكم.. الحقيقة شي يشرف!
سامحينا.. سامحينا
- انتي.. ياللي هناك.. اش هاللي يايبته معاچ.. ها؟.. مابقى إلا وتفتحين بقالة.. تارسة الجنطة علوچ وكاكاو وتبيعينهم عالبنات.. لا فالحة.. يصير خير إن شاء الله.
أنا أبلة، ما يبت إلا شوية علشان أعطيهم بنات صفي مو أبيعهم.. صدقيني.
- لا امصدقتچ.. واضح من الورقة اللي كاتبة فيها أسماء الطالبات والطلبات!
*.. آسفة آخر مرة.
- وانتي يا الزعيمة.. اش ناوية تسوين..؟؟ حفلة؟!.. أشرطة كاسيت ومسجل..!
أبله أنا مو قصدي.. أنا حطيتهم بالغلط.
- أي أنا عارفة.. واضح أن انتي حطيتيهم بالجنطة وانتي بسابع نومة.. دواكم عندي بإذن الله.
ما راح أعيدها.. سامحيني.
- وأنتي ما تبين نفتح لچ مشغل مرة وحدة؟!.. هالصور.. والأزياء.. وكتالوجات.. ياسلام.. مو باقي إلا مكينة الخياطة!
يبتهم بحسن نية.. لبعض البنات.. وتوبة بعد.
- ما عليه.. وين بتروحون مني.. ! وانتي.. اشرايچ نخلي لچ في صالة المسرح.. غرفة اتسوينها صالون؟!.. مكياج.. وعطور.. واكسسوارات.. يا فرحتي فيكم.
أنا..!! قصدي.. أمس كنت معزومة.. ومو عارفة اشلون دخلو بالجنطة.
- أها.. أنا اللي أعرفه إن.. هالأشياء لها ريلين وتقدر تمشي.. أكيد مو أنتي السبب لا تخافين.. مهزلة.. صچ مهزلة!
أبله صدقيني.. وأنا أقولچ سامحيني.. ماراح أعيدها.
- وأنتي...ياللي واقفة آخر وحدة.. المبدعة فيهم.. اش تبيني أقول؟!.. اش تبيني أسوي فيچ..!
أبله.. صدقيني ما لي ذنب.
- قولي بعد ما كنتي تدرين؟!
أي.. صچ ماكنت أدري.. فتحت الجنطة ولقيتها.
- يعني اش تبيني أسوي.
نعطيها علبة السردين وراح تشبع وتسكت.
- شنو؟؟.. منو اللي بتعطينها علبة السردين وتسكت؟؟!
القطوة اللي يايبتها معاي !!
- شنووو.. قطوة؟!.. قالوا لي يايبه لعبة الباربي معاج !!
شي ما شفتوه:
- يا أبلالالالات.... الحين.. الحين تصيدون القطوة.. تطلع يعني تطلع.. ما تدرون اني أخاف من القطاوة ! الله يغربل بليسكم يا بنات اهئ اهئ اهئ.