أنوارعبدالرحمن
(عزيزة) ألقت سؤالا على زميلاتها في العمل عن أحلامهن وما يتمنينه من صفات في زوج المستقبل، وكانت هذه إجاباتهن.
- ممكن أسألكم سؤال يا آنسات ويا عانسات ويا مطلقات عن أحلامكم.. وصفات زوج المستقبل.
- إي.. طبعا ممكن ونص!
- ويه.. ما عندكم سالفة.. لا تعيشون بالأحلام.. ترى بتنصدمون بعدها.
- رجاء يالمتزوجات مانبي نصايحكم ولا تعلقون.. ياربي.. السؤال مو اموجه لكم.
- احنا نبي انفيدكم من تجربتنا.
- الصراحة اللي تسمعكم، بتهون وما تتزوج.
- عزيزة.. اسألي.. راح انجاوبچ.. وانتو يالمتزوجات لا اتدخلون فكونا من نصايحكم.
- سؤالي راح أوجهه أول شي للآنسات الصغيرات، شنو الصفات اللي تتمنونها في زوج المستقبل، وخل نبدي في أمونه.. تفضلي جاوبي.
- أنا أتمنى زوجي يكون الصراحة حلو، ومركز وعايله، ويموووت علي، ويدللني ويلبي طلباتي كلها.. واتمنى..
- بس.. بس احنا قلنا هالشي قبلچ.. وأغلب اللي تمنيناه ما صار.
- أوووه قطيعة.. انتوا يالمتزوجات كله رازين ويهكم، موقلنا لكم لا اتدخلون؟
- الشرهة علينا اللي قاعدين انبهكم.
- يا ماما.. ما لكم شغل فينا، احنا كيفنا نحلم.. نطير.. انطيح، كيفنا.. أووف!
- خلاص.. على راحتكم.. احنا ماراح نتكلم.. وانتوا اللي بعدين بتاكلونها.
- والحين السؤال لچ يا عذاري، قولي لنا صفات زوج المستقبل اللي تحلمين فيه؟
- أنا الصراحة ابيه طويل، ومجسم..وأسمر خال، أمووت عالصبغة، ويكون لاعب رياضي، عنده دروع وشهادات تقدير وميداليات، ويحطون صورته بين فترة وفترة بالجرايد.
- اممم عذورة هذا حلمچ غريب!.. شكلچ حاطة العين على واحد منهم.
- ها؟!.. اممم.. لا.. اشدعوه.. ما في شي ابحلمي غريب.
- عيل اشلون ركزتي على موضوع الدروع والميداليات؟!.. آنا أقول اشعندچ كل يوم امبققه اعيونچ على صفحات الرياضة!
- ههههه لا.. لا مو هالدرجة.. بس لأني أحب الرياضة!
- عذاري الله يهديچ.. لا تحرجينها.. طاف.. طاف هههه
- ههههه خلاص ماراح أحرجها.. والحين نبي نسمع سلوى.
- بما اني اعترف اني عانسة.. اتمنى اتزوج واحد اصغر مني بالسن.. هههه.
- الحين خل ياخذچ اللي ابسنچ، بعدين فكري باللي اصغر منچ.. صچ ماعندچ سالفة.
- إي عيل آخذ شايب يأذيني على آخر عمري، أبي اتزوج واحد يهنيني مو كل ساع يتشكى، تعالي حطي لي فكس.. وإلا همزيني، وإلا لاتنسين تذكريني بموعد ادواي، أو كل ما قلت له خل نتمشى يقولي مالي خلق ويحط راسه من المغرب يشخر!
- صچ انچ قوية.. المفروض ما تتشرطين على هالعمر.. ما سمعتي بالمثل اللي يقول «ظل راجل.. ولا ظل حيطة»؟
- هالكلام بهالزمان تغير.. المرة صارت ابمكان الريال، وبيوت اهلنا متروسة جدران هههه..اهو بس خل ايي وبعدين يمكن بذاك الساع اغير رايي هههه.
- على قولتچ هههه... والحين نبي نسمع سناء.
- بما ان قطار الزواج بعد عني.. فأنا انتظر نصيبي على احر من الجمر في أقرب محطة، لأني مليت من الوحدة وكل رفيجاتي متزوجات، وأبي الستر.
- يعني ما عندچ امنية معينة في فارس أحلامچ؟
- قبل 10 اسنين كنت اتمناه حلو ومزيون وعنده شهادة مو أقل من ماجستير، ومن عايلة معروفة، ويحبني ويموت على التراب اللي امشي عليه.
- وبعدين؟
- وبعد 5 سنوات تنازلت! قلت مو شرط حلو، حتى لو عنده دبلوم، وزواج يكون تقليدي.
- هههه والحين؟
- والحين، مثل ما قلت لچ بس ابي الستر.
- ليش؟.. اهلچ مو ساترين عليچ؟ هههه اتغشمر.
- هههه امبلا.. بس الزواج غير.
- وانتي حميدة.. كونچ امطلقة.. قولي لنا شنو صفات فارس احلامچ؟
- أنا ما عندي احلام.. بس ابي واحد يعوضني اللي فقدته.
- يعني ما عندچ صورة بخيالچ لفارس احلامچ؟
- لا فارس ولا حارس.. المهم اتزوج واحد يعوضني اللي فات من عمري.
- يا بنات.. اشفيها احلامنا وكل مالها وينزل سهمها هههه.
- شنسوي بعد.. هذا الموجود ههههه.
- وانتي ياللي قاعدة اتحققين معانا، ما قلتي لنا شنو تتمنين في فارس احلامچ وزوج المستقبل.
- اتمناه ما يشوف في الدنيا وحده غيري، ولا يسمع صوت غير صوتي، ولا يحتل قلبه احد غيري، لو أأشر بأصبعي يقول لبيه.. ويعطيني كل اللي اتمناه، قبل لا أطلب أي شي وقبل لا اتكلم أفتح عيني وألقاه.
- يا سلالالام.. اشهالزوج.. هذا يبيله تكتبين مواصفاته وتقدمينها لمصنع يسوي لچ رجل آلي مثل ما تحلمين.
- يعني شنو؟.. مافي واحد بهالدنيا بهالمواصفات؟
- امبلا.. في.. أثنين.. واحد مات.. والثاني ما انولد هههه.
- ههههه.. أقول يابنات.. خلونا انكمل شغلنا، الظاهر سالفة الأحلام ماتييب إلا القهر.
- ههههههه.
- مو قلنا لكم لا تحلمون وايد.. بس انتوا ماتبون راينا احنا يالمتزوجات.
- يا بنات عندي لكم فكرة.. بما ان احنا المو متزوجات عددنا مو اشويه.. اشرايكم كل واحدة فيكم تعطيني صورتها عشان انوديها للخطابة (أم محمد) اللي كلمن يتكلم عنها؟
- أي فكرة حلوة.. مو مشكلة.. من باچر بنعطيچ اصورنا.
- ابييه فشلة.. احنا عددنا وايد.. غير البنات اللي بالقسم اللي يمنا.
- هههه ما عليه المهم.. يمشي هالقطار.. توت.. توت هههه.
- اتصدقين.. الخطابة شكلها آخر شي.. بتلعب بصورنا (اعكوس) ههههه.
- إي.. حده ههههه.
شي ما شفتوه:
- يا بنات.. شخبار الخطابة اللي ودينا لها اصورنا من سنة؟
- وي.. مادريتوا؟!.. ياها ذاك الريال اللي مايتطوف.. تزوجت وبطلت خطبه!
- يعني.. ما كانت اهي متزوجة؟!!
- لا.. يقولون افتحت باب الخطبة شكليا.. عشان تخطب حق انفسها.
- هااا؟!