أنوارعبدالرحمن
ام ضاري امرأة صالحة، تحث ابنها على الصلاة بوقتها، لكن المشكلة تكمن في زوجها غير المصلي، فكيف ستعالج الامر اذن؟
بين الام وابنها:
هاك حبيبي ضاري «النص دينار» عشان صليت اليوم الصلوات الخمس كلها.
مشكورة يمه.
وكل مرة ان شاء الله جذيه، وبآخر كل شهر لك هدية كبيرة.
وناسه، بس يمه ابوي ليش ما يصلي؟
من قالك ما يصلي؟ اهو يصلي بالمسجد.
بس ما شوفه يروح للمسجد.
لا، امبلا يروح، بس انت يمكن تكون نايم او طالع.
بين الام والزوج؟
بو ضاري، لي متى ماتصلي، الولد قام ينتبه، ويسألني عنك، يبي يشوف قدوة بس مو لاقي.
يعني لازم انا اصلي عشان اهو يصلي؟
مو انت تهدم اللي قاعدة ابنيه انا، احثه على الصلاة وانت ما تصلي، وقاعدة اجذب عليه اقوله ابوك يصلي بالمسجد عشان ما يسألني عنك.
مو قلت لچ لا اتحنين على هالسالفة؟
يعني بعرف لي متى ما تصلي؟
ليما ربي يهديني.
ومتى ان شاء الله؟
ليما ربي يكتبها.
اووف، صچ طقت جبدي منك.
بين الولد والاب:
يبا، ابيك توديني المسجد وياك اذا رحت اتصلي هناك.
كاهو المسجد مو ابعيد عن بيتنا، لازم انا اللي اوديك؟
اي، مثل مبارك رفيجي، دايما يروح مع ابوه.
انت روح مالك شغل فيني، انا اصلي بمسجد بعيد ثاني عند الربع.
انزين، ماراح تعطيني هدية عشان صليت.
امبلا، شنو تبي؟
ابي ساعة شايفها بالسوق.
ان شاء الله، عقب باچر اوديك السوق واشتريها لك.
الولد مع الاب في السوق:
هذي الساعة يا يبه اللي ابيها.
تستاهل، بجم لو سمحت هالساعة؟
يبا، يبا، اذان المغرب.
هاا؟
اذان المغرب، ما تسمعه؟
شنو؟ اي، امبلا، ليش؟
خنروح انصلي بالمسجد.
ها، اقول يا وليدي ليش ماتروح اتصلي ابروحك؟
ليش يبه، انت اشفيك، ليش ما تبي اتصلي؟
لا، يا وليدي مو قصدي، اممم، انزين، اذا انا صليت معاك بالمسجد عطني الفلوس اللي ابوكي هذي.
ليش يبا؟
لأني مو قادر امشي الحين على ريلي، شوف لي عربانه اتوصلني هناك.
شي ما شفتوه:
بعد يوم:
قومي صلي يا مرة.
باسم الله فززتني من نومي اش تبي؟
ما سمعتيني شقول؟ اقول قومي صلي اذان الفجر.
ها، آنا بحلم والا بعلم، مو امصدقة اللي قاعدة اسمعه.
ليش يعني، مو عاجبچ؟
بالعكس انا بطير من الفرحه، ودي ألولش.
لا، مالا داعي تخرعين الناس ابهالليل، هذا شي طبيعي ولازم اسويه.
قولي شنو صار لك اليوم عشان حسيت بالندم؟ اشلون يت لك الفكره تقعدني للصلاة؟
توني راد من الديوانية، فسمعت اذان الفجر فقلت بقلبي، مرتي تحافظ على صلاة الفجر، فقعدتچ اتصلين.
يعني شنو؟
يعني روحي صلي، وانا بحط راسي وانام.
هاا، آآآه يا ربي متى اتهديه؟