أنوارعبدالرحمن
مواقف كثيرة تمر بنا مع الخدم، وهذا الموقف ليس بغريب على البعض منا، وهنا سأعيد إلى الأذهان مشهدا حدث في بعض البيوت:
الخادمة مع أم حسين:
- ماما.. تعالي شوفي ميري يبكي واجد داخل دار
- هو!.. اشفيها؟
- زوج مال هوه يبي يسوي عروسة تاني
- يا عله الظربه.. حسباله اهو ريال الحين؟!
أم حسين عند ميري في غرفتها:
- ها ميري اشفيچ؟
- ماما.. زوج مال آنا يبي يسوي شادي اهئ اهئ اهئ
- ليش.. اش عنده هذا بعد طايح الحظ.
- ماما.. هوه سوى مكتوب.. يقــــول إذا انتي مايجي هذا شهر.. يجيب عروسه ثاني.
- وهو على كيفه يامر.. ما صارلچ سنة من ييتي والحين بتسافرين له مالت عليه؟!.. والتذكرة منو بحسابه؟
- ماما بليز.. لازم سوي تكت بسرعة.. بعدين آنا موت إذا هوه سوى شادي.
- ياعله الشاذي اللي يتعلق برقبته، ابروحه ماكل معاشچ كله وانتي ساكتة له.. وعلى شنو؟!.. ياليته عاد فيه اشوية حلا.. شيفته اتييب اليهد.. ما غير قاعد ابهالوزار داخل هالمحكر.. يطبخ ابهالشاول.. ويدردع ابهالزحير.. وبعد تبجين عليه؟!.. ما قول إلا مالت عليج انتي وياه.
- ماما.. آنا لازم يبي روح لازم.. بليز ماما اهئ اهئ اهئ
أم حسين مع زوجها:
- بو حسين.. شنسوي مع هالخدامة اللي اطلعت لنا سالفة هالسفرة.. صار لها 3 أيام لا تاكل ولا تشرب.. ويّها أصفر.. وذابحة نفسها من البچي؟
- خليها تولي.. حقران يقطع المصران.
- من صچك انت؟.. راح تموت بين ايدنا واحنا انتفرج عليها.
- مالچ شغل فيها.. هذي عيارتهم ماتعرفينها.. مصيرها بيطقها اليوع وتطلع من دارها مثل الفار.
- ياربي.. أحر ما عندي.. أبرد ما عندك.
- يعني اش تبيني أسوي آنا هذي مهنتي بس.. يا يايب وحدة.. يا امودي وحدة، وبعدين آنا قايلچ كافي عليچ ثنتين.. الثالثة بعرف شنو مهنتها؟!
- الثالثة حق اليهال.
- وانتي اش مهنتچ؟
- آنا؟!.. عاد هذا يبيله سؤال هههه
- وتضحكين بعد؟!.. ياليتچ عاد فالحة بشي.
- چذيه يعني؟!.. عيل تدري اشلون غصبا عليك اتقص لها تذكرة وتوديها.. وتييب لي غيرها.. آنا سكت لك وايد.. كافي معاشي تسحبه من رصيدي كل شهر ومقعدني عالحديدة.. بعرف يعني شنو الفرق بينك وبين زوج ميري!
ميري مع أم حسين يوم السفر:
- هو.. هو.. هو اش هالكشخة ميري.
- آنا يلبس هدوم هلوه.. حق زوج مال آنا.
- وين اللي كنتي تبين اتموتين؟!
- الهين مافي موت ماما.. الهين يبي يسافر يجي زين.
- إي طبعا.. كل شي تغير عشان هالشيفه ريلچ بو وزار منتف.
شي ما شفتوه:
أم حسين مع زوجها:
- ها؟.. ارتاح قلبچ الحين؟!.. هذا اللي كنت اقوله لچ قبل لا اتسافر ميري.
- وآنا أقول اشلون صارت مثل الحصان يوم السفر، أثاري حاطه الماجله تحت السرير!