أنوارعبدالرحمن
زميلتان فتحتا ملف حساس وجريء في موضوعه، وتناقشتا به حتى وصلتا إلى نتيجة غير متوقعة..
- ياختچ آنا مادري لي متى هالجهل اللي فينا، الحين الاختلاط بكل مكان، بس المشكلة اللي ما يفرق بين الزمالة وغيرها بين الجنسين داخل العمل.
- اشلون يعني؟
- يعني احنا بدواماتنا.. عندنا موظفين، وهذولي بالنسبة لنا زملاء، والزمالة لها حدودها في التعامل والاحترام بين الاثنين.. اممم فهمتي شنو اقصد؟
- فهمت.. كملي.
- بس في بعضهم يخلطون بين الأوراق.. فتنقلب الزمالة إلى علاقة ثانية من كثر التعامل اليومي مع بعض.. وهذا شي غلط طبعا.
- صاچة.. هذا نشوفه بعض الأحيان، في بعض الأماكن.
- وحنا في مجتمع محافظ له عاداته وتقاليده.. للحين ما نستوعب مثل هالعلاقات.
- عشان چذيه لازم الوحدة تاخذ حذرها في التعامل مع غيرها، سواء كان مرة أو ريال.
- اتصدقين وايد رياييل سووا مشاكل مع حريمهم، وبعضهم طلعوهم من أماكن عملهم، وبعضهم حددوا لهم المكان اللي يبونهم يشتغلون فيه، والسبب ما يبونهم يتعاملون مع الموظفين اللي معاهم.
- شوفي.. آنا بالنسبة لي ريلي ما منعني من شغلي مع الموظفين.. لأن عارف منو آنا.. وأخلاقي اشلون صايرة.
- حتى آنا.. يهمني اني اتعامل بشكل رسمي مع الكل، لأن احنا مثل ما قلتي عندنا دين وعادات وتقاليد تحكمنا، مو بس اتأثر فينا احنا الحريم، حتى مع الرياييل، لأن الريال يعرف من نظرته نوعية البنت اللي چدامه.
- هذا اللي كنت بقوله لچ وكان على طرف لساني، حتى الريال يحكم عالوحدة من طريقة تعاملها معاه أو مع غيره من الموظفين.
- اتصدقين وحدة من رفيچاتي قالت لي عن موقف صار لها بالسوق، كانت تتسوق مع زوجها.. چان يمر واحد من الموظفين اللي يشتغلون معاها چدام المحل اللي كانت تشتري منه فابتسم لها لا إرادي، فابتسمت له.
- ابيييه.. وبعدين.. اش صار؟
- انتبه زوجها حق الموظف.. وماوعت إلا وانقلب حاله امية درجة، طلعها من المحل وقام يصرخ عليها.. منو هذا؟.. من وين عرفتيه؟.. اش سالفتچ وياه؟
- مسكينة.. شنو قالت له؟
- تبي اتفهمه ما اقدرت.. تقول ظلت اسبوع مع زوجها تقنعه انه اللي ابتسم لها موظف معاها بالدوام ومابينها وبينه شي، بس ما كو فايدة، وآخرتها اطلعت من الدوام واقعدت بالبيت.. ولي يومچ مو ناسي.
- وااي.. اتصدقين اكسرت خاطري.
- شنو يعني إذا مر وابتسم لها، شنو هالعقد؟ احنا وين قاعدين وبأي زمن؟
- هذي غيرة الرجل الشرقي، خاصة الكويتي.
- لا يا حبيبتي.. مو غيرة.. إلا اخبال وينون.. اش سوت يعني هالمسكينة؟
- يعني انتي لو ابمكانه.. شنو بتكون ردة فعلچ؟
- ها؟
- لو وحدة مرت بالسوق وانتي تتسوقين مع ريلچ، وابتسمت حق زوجچ زميلة معاه في العمل.. وهو ابتسم لها، وقال لچ انه ما بينه وبينها شي، شنو بتكون ردة فعلچ؟
- آنا أذكر يوم كنت بالجمعية مع زوجي، وسلمت عليه طالبة كان يدرسها يوم كان معيد بالجامعة.
- وشنو سويتي؟
- وي ما قلت لچ.. من يوم سحبته ذيك المرة من بلاعيمه چدام الناس، ما قام يمشي إلا منزل راسه كل ما طلعت وياه.
شي ما شفتوه:
- حبيبي يا زوجي الغالي.. ممكن أسألك سؤال؟
- سألي.
- شنو معنى الزمالة في العمل بين الريال والمرة؟
- ها؟.. آنا مادري !!.. بلاعيمي اتعورني ما اقدر أفيدچ ابهالموضوع.. سألي واحد غيري اهئ اهئ اهئ.