أنوارعبدالرحمن
الإجازة المدرسية بدأت منذ فترة، وأصبح أغلب الناس ديدنهم السفر، وكأن من يظل طوال فترة الصيف والإجازة في البلد، أصبح خارجا عن عادة السرب.
-
حنان.. تعالي شوفي اعيالج شمسوين في الصالة؟
-
نعم عامر.. شمسوين بعد؟
-
ما بقى قشور حب وما بقى عصير ولا هالشبس إلا امقطط عالأرض، والوجبات السريعة ماكلينها وامخلين كل شي عقبهم، والوسخ بكل مكان بالصالة.
-
هذا من الفراغ اللي اهم فيه، طول الليل سهرانين والساعة 5 الصبح يالله ينامون.
-
يعني معطيتهم عذر على هالوسخ، الفوضى؟
-
لأ.. بس آنا قايلتلك العطلة طويلة، واليهال ملوا يبون يسافرون حالهم حال هالبشر، وما عندهم إلا السهر عالنت والتلفزيون، حتى الخدم ملوا من هالحوسه، كل ما يقومون الصبح يلقون عقبهم الأكل والفوضى.
-
يعني انتي للحين مو فاهمة وضعي؟!.. من عشر أيام حجزت لكم اسبوع في الخيران، وأول الإجازة وديتكم العمرة، اشتبون أكثر؟!.. حتحتوني وجيبي فاضي حتى موقادر حتى أعطي هالخدم معاشاتهم آخر الشهر.
-
عامر أنا قلت لك بيع وانيتك، واقف عند الباب ومو قاعد تستعمله، خلنا عالأقل نسافر انغير جو بلا هالغبار ودرجة الحرارة اللي اوصلت فوق الستين؟!
-
مادري انتي من مواليد اسكوتلندا مو قادرة تتحملين الحر!
-
عن التعيب.. قلت لك نبي انسافر طقت جبدنا.
-
آنا أقول ياليت نورية الصبيح امخليتكم اتداومون وتحرمكم من الإجازة خاصة انتو يالأبلات، عشان تحسون بغيركم!
-
فال الله ولا فالك.
-
بعد ثلاثة أيام:
-
أقول.. عامر.
-
اشتبين بعد؟
-
دام انك ماتبي تسفرنا.. آنا بروح أسامع مع أهلي.
-
يارب اتصبرني على بلوتي.
-
انت منت راحمنا ولا امخلي رحمة ربي تنزل علينا !
-
آنا واحد ما عندي فلوس، والوانيت حامض على بوزج ماراح ابيعه، نافعني حق أشياء وايد، تبين اتسافرين على احسابج كيفج، بس شرطي تاخذين العيال كلهم معاج، آنا واحد ما لي خلقهم، وشغلي شفتات وماراح أقدر أجابلهم، وأجابل حنتهم ولويتهم وأذيتهم.
-
جذيه يعني من الحين شلت إيدك عن المسؤولية؟! وبعدين من وين أصرف عليهم وتذاكرهم على منو ياشاطر؟!
-
آنا قلت لج.. اني ماعندي، تبين اتسافرين؟! شرطي تاخذي اعيالج وتتحملين مصرفهم والتذاكر.
-
يعني تبيني اتسلف من أختي هذا قصدك آنا عارفة؟
-
كيفج.. تصرفي مثل ماتبين.. وتقدرين بعدين اتسددين دينج، انتي أبلة ومعاشج راهي!
-
أي.. كل الناس حاطه عينها على هالمعاش، اللي كلمن يجره من صوب، بس أمري لله بتحمل اديون وغرابيل، ولا أقعد ابهالحر والغبار.
بعد اسبوعين:
-
ألو.. حنان اشلونكم.. عساكم مستانسين؟
-
أي الحمد لله مستانسين.. بس ما حاتي إلا هالدين اللي على ارقبتي.
-
خلاص بعد، المهم سافرتي.. مو انتي تبين تغيرين جو؟!
شي ما شفتوه:
-
أيا النصاب.. تخليني اتسلف عشان آخذ اليهال، وآخرتها أرجع وألقاك مسافر مع ربعك وانت تقول انك مفلس، قولي جم تدينت على هالسفرة؟
-
ما تدينت.. بس بعت الوانيت!