أنوارعبدالرحمن
بعض الأحيان ذكريات الطفولة تكون جميلة وسعيدة وبعض الأحيان تحتفظ بأحداث مؤلمة وحزينة، ولكل أثرها على النفس، لكن ذكريات الشاب علي مختلفة..
-
عيدچ مبارك خالتي.
-
ياهلا وغلا.. تو ما نورت الديرة.. الحين صار العيد عيدين بشوفتك ياولد أخيتي وردتك من الغربة.
-
تسلمين يا خالتي وأنا أول مرة أحس بالعيد لأني بينكم.
-
عيل تدري اشلون.. بعد العيد ان شاء الله بدور لك بنت الحلال اللي تستاهلك.
-
لا يا خالتي.. تو الناس خليني اشتغل أول، وأسوي العملية اللي حق عيني.
-
هو.. ليش؟
-
لا تخافين.. اهي عمليه سريعة وبسيطة.
-
إي تذكرت.. يوم تحذفك بنت خالك سويرة بالصخرة على اعيونك.. وخلتها تصب، صب الله اعظام العدو.
-
يا خالتي ليش امعورة قلبچ سالفة صارت وحنا يهال وانتهت، وسويت 3 عمليات تجميل وصارت أحسن من أول بوايد، وأنا ريال ما يعيبني شي.
-
خنت حيلي عليك يا ولد أخيتي، طول عمرك قلبك أبيض طالع علي.
-
إي خالتي صچ بسألچ، أنا سمعت انها تزوجت؟
-
لا.. وي.. منو يبيها هالقشرة؟
-
هههه خالتي انتي للحين شايلة عليها.
-
صچ اهي بنت أخوي، بس الصراحة مو ناسية يوم تبط لك عينك.
-
الله يهديچ بس يا خالتي.. هم أنا كنت طاقها بصخرة بس ما حاشتها ههههه.
-
ماما.. في حرمة يبي أنتي.
-
حرمة؟ منهي هالحرمة؟
-
ماما أم ضاري وبنية.
-
وي.. ياليتنا مايبنا طاريهم، لو ذاكرين لنا شي زين جان أحسن، خليهم يدخلون ما في احد غريب.
-
منو؟ علي؟ انت بالكويت؟ الحمد لله عالسلامة.
-
الله يسلمچ يا ام ضاري.. أنا خلصت دراسة الحمد لله.
-
مبروك.. بس محد قالنا.
-
اي كنت امخليها مفاجأة.
-
إي صچ علي.. أنت ما عرفت سارة؟ اشفيك ما سلمت عليها؟
-
يا خالتي العتب عالنظر سامحيني.
-
خنت حيلي عليك يا ولد أخيتي.. ما يشوف عدل من يوم بطت بنتچ اعيونه.
-
احم احم.. خالتي اشفيچ؟
-
يمه أنا بروح البيت الحين بتمشين معاي وإلا بتقعدين؟
-
چذيه يعني ارتحتي البنت ازعلت، ما تبطلين من سوالفچ هذي؟
-
هو أنا اشقلت؟ ما قلت إلا الصچ.
-
عن اذنكم آنا طالعه.
-
سارة.. سارة.. تكفى علي روح كلمها وقول لها انك مو مضايق من سالفة قديمة صارت بينكم وانتوا يهال.
بين علي وسارة:
-
سارة اشدعوة هالزعل كله، خالتي كانت تتغشمر.
-
يعني ما سمعت اشقالت عمتي؟ هذي سالفة صارت وانتهت من سنين يوم كنا يهال اهئ اهئ اهئ.
-
عاد اتصدقين.. كل ما طالعت اعيوني بالمنظره تذكرتچ.. وأقول بيني وبين نفسي، ما راح ارتاح إلا لما اشلع لها اعيونها مثل ما اشلعت لي اعيوني.
-
شنووو، من صجك؟
-
لا تخافين اتغشمر هذا اللي يقولون عنه ظرب الحبيب مثل الزبيب، يعني الصخرة اللي بطيتي فيها عيني هذي سوت شيء بقلبي ههههه.
-
ابيييه استحي.. لا تقول چذيه.
-
انزين.. سويرة.. تتزوجيني وإلا ترى..
-
ههههه الصراحة فاجأتني.
شي ما شفتوه:
-
خالتي.. وانت يا أم ضاري سمعوني.
-
قول.. بشر.
-
خلاص رضت سارة وطلبت ايدها للزواج.
-
صچ؟ هذي الساعة المباركة اللي اجمعت بينك وبين بنتي.
-
هو هو هو، تروح تبي تراضيها، ترجع خاطبها، اقلبت رأسك هالدعلة، تبي تتزوج اللي بطت عينك وشوهت ويهك؟
-
اشرايچ.. يا خالتي لو أبط عينها مثل ما بطت عيني مقابل الزواج؟
-
ها.. إذا كان جذيه ميخالف.
-
ههههه أثاريچ منتي هينه يا خالتي، وانت يا ام ضاري سمعينا من يبابچ.
-
كلللوووش.. وچدام اللي مو عاجبه بعد ههههه.