أنوارعبدالرحمن
إسراء امرأة مهتمة بحضور الدورات الخاصة بالتنمية البشرية، واليوم دار بينها وبين زميلتها حوار عن هذا الموضوع.
-
السلام عليكم بنات، أشوه ان الدكتور ما وصل، حسبالي المحاضرة ابتدت، وآنا يايه طايرة من البيت بغيت أدعم بتنكر، لوما ربي ستر.
-
إسراء، انت الظاهر ما تدرين ان الدكتور يت له سفرة مفاجأة، وراح ايينا أستاذ ثاني.
-
وي حسافة، عاد الدكتور الثاني حلو مثله؟
-
مالت عليچ.. يعني هذا بس اللي يهمچ؟
-
اي ياختچ.. ما تنفتح نفسي للعلم إلا لما يكون الدكتور اللي يدرسني حلو، وبعدين تدرين لما وحدة يطوفها قطار الزواج، وتدرس على كبر، يصير نظرتها مختلفة.
-
ليش؟ انت يايه تتعلمين والا بتتزوجين؟
-
ما تدرين يمكن نصيبي بالمستقبل يكون مع دكتور أكاديمي، وأحركم هههه.
-
إي حلمي، ولا تنسين تخططين عدل للمستقبل.
-
على طاري الأحلام والتخطيط، اليوم ياني مسج من صديقتي عن دورة اسمها خطط لحياتك، بس انا مترددة، كلما خططت خربوا علي البلدية هههه.
-
إسراء، آنا أنصحچ تدخلينها، عشان تخطيطچ يصير على أساس قوي.
-
تدرين أنتي خططي لي وانا اللي أييب العمال هههه.
-
هههه الله يقطع ابليسچ ضحكتيني، بس صچ.. لا تطوفين دورات مثل هذي ترى تفيدچ وايد في حياتچ.
-
يا معودة، كل ما رحت دورة ألقى المحاضر يقول لنا محد غيره مرخص يعطي هالدورة في الديرة، وبعضهم ياخذ 400 دينار بس عشان دورة نقدر نسمعها ونلقاها في شريط أو كتاب، صارت السالفة بوق.
-
مو كلهم لا تجمعين، في محاضرين فعلا هم المؤهلين اللي يعطون هالدورات، وساعات تكون أسعارها فعلا تستاهل هالغلا.
-
واحنا ما لنا مهنا إلا ندفع؟.. وبعدين حفظنا عناوين الدورات عن ظهر قلب، نبي شي يديد غير.
-
اشرايچ بدورة العلاج بخط الزمن، اعرف مركز يعطي دورات وايد.
-
هذي اشلون قايلة؟
-
يعني تتخلصين من الضغوط والأحزان القديمة بطريقة تستذكرين فيها اللي مضى، وتبجين وتطلعين اللي بقلبچ، لين ينتهي تأثيرها السلبي على حياتچ.
-
مممم، وبعد شنو عندهم غيرها؟
-
عندهم دورة اسمها كيف تصبح شخصية محبوبة؟، وبعد، كيف تصبح شخصية مغناطيسية، ودوره اسمها غير حياتك، ودورة النجاح في العمل.
-
واااي أبيييه، مليت من كثر ما سمعتهم، صرت ما أفتح راديو، ولا أطالع التلفزيون إلا وألقى نفس هالدورات مع تغيير بسيط بالعناوين، لا.. ما بيها.
-
انزين في دورة اسمها كيف تصبح قائدا ناجحا.
-
شنو؟ أنا بدش حرب؟.. ما في غيرها.
-
بس.. ماراح أقول لچ أسامي الدورات اللي عند المركز، لوعتي چبدي، ومنتي فاهمة شي.
-
الصراحة أسامي الدورات اللي قلتيها كلها من كثر ما سمعت عنها، لاعت چبدي، خوفي باچر تطلع لنا مع.. هدايا ادخل السحب هههه، اتصدقين الظاهر آنا اللي بعطي دورات من كثر ما حضرتها.
-
خلاص.. خلاص سكتي، شكله الأستاذ اليديد وصل.
شي ما شفتوه:
-
إسراء، هالأيام اشفيچ ما تتصلين ولا تسألين، اشدعوه تكبرتي علينا من يوم قمتي تعطين دورات؟
-
لا.. لكن الشغل وايد، والحضور لدوراتي حده قوي، لدرجة ما تلقين كرسي فاضي.
-
صچ؟ وي حسافة عيل أنا كنت ناوية اسجل عندچ مع أختي وبنات خالتي وناخذ عندچ دورة، بس دام مافي مكان، ماكو فايدة.
-
لا.. اشدعوة؟.. تعالوا وسجلوا، وييبي اللي يعز عليچ بعد، الصراحة من يوم اشتركت بواحد من المراكز وقمت أعطي دورات، وأنا حاطة ايد على ايد، لا حضور ولا مشاركين، ولا يحزنون، اهئ اهئ اهئ.